ഇ വേ ബില്‍ ആസാമിലും രാജസ്ഥാനിലും ഈയാഴ്ച മുതല്‍

ന്യൂഡല്‍ഹി: ഇലക്ട്രോണിക് വേ ബിൽ അഥവാ ഇ വേബിൽ നാളെ ഈ ആഴ്ച മുതല്‍ രാജസ്ഥാനിലും ആസാമിലും നടപ്പിലാക്കും.ഒരു സംസ്ഥാനത്തു നിന്നു മറ്റൊരു സംസ്ഥാനത്തേക്കു സാധനങ്ങൾ കൊണ്ടു പോകുന്നതിനു ചരക്ക്, സേവന നികുതി പ്രകാരമുള്ള ബില്‍ ആണിത്.

ധനകാര്യ മന്ത്രാലയത്തിന്‍റെ അറിയിപ്പനുസരിച്ച് ആസാമില്‍ മെയ് പതിനാറിനും രാജസ്ഥാനില്‍ മെയ് ഇരുപതിനുമായിരിക്കും ഇത് നിലവില്‍ വരിക.

ജി.എസ്.ടി. നിയമമനുസരിച്ച് 50,000 രൂപയില്‍ കൂടുതല്‍ വിലയുള്ള സാധനസാമഗ്രികള്‍ ഒരിടത്തുനിന്നും പത്ത് കിലോമീറ്ററിലധികം ദൂരെയുള്ള മറ്റൊരിടത്തേക്ക് കൊണ്ടുപോകേണ്ടി വരുന്ന സാഹചര്യങ്ങളില്‍ ഉപയോഗിക്കേണ്ട രേഖയാണ് ഇ-വേ ബില്‍. ചരക്കുനീക്കത്തിന് ഉപയോഗിക്കുന്ന വാഹനത്തിന്റെ വിവരം ഉള്‍പ്പെടെയുള്ള പൊതുകാര്യങ്ങള്‍ രേഖപ്പെടുത്തി ഗതാഗതം ആരംഭിക്കുന്നതിന് മുന്‍പായി ഇന്റര്‍നെറ്റ് ഉപയോഗിച്ച് ഇ-വേ ബില്‍ ഉണ്ടാക്കി വാഹനത്തില്‍ സൂക്ഷിക്കേണ്ടതാണ്.

സാധന സാമഗ്രികള്‍ ജോബ് വര്‍ക്കിനായി അയയ്ക്കുമ്പോഴും ജി.എസ്.ടി. രജിസ്ട്രേഷന്‍ എടുക്കേണ്ടാത്തവര്‍ കരകൗശലവസ്തുക്കള്‍ പോലെയുള്ള സാധന സാമഗ്രികള്‍ മറ്റു സംസ്ഥാനങ്ങളിലേക്ക് അയയ്ക്കുന്ന സന്ദര്‍ഭങ്ങളിലും ഇ-വേ ബില്‍ നിര്‍ബന്ധമാണ്.