രാജ്യം വീണ്ടും തെരഞ്ഞെടുപ്പ് ചൂടിലേക്ക്; 56 നിയമസഭാ മണ്ഡലങ്ങളും ഒരു ലോക്സഭാ മണ്ഡലവും നവംബർ ആദ്യവാരം വിധിയെഴുതും

ന്യൂഡൽഹി: രാജ്യത്ത് വിവിധ സംസ്ഥാനങ്ങളിലെ 56 നിയമസഭാ മണ്ഡലങ്ങളിലേക്കും ബിഹാറിലെ ഒരു ലോക്സഭാ സീറ്റിലേക്കുമുള്ള ഉപതെരഞ്ഞെടുപ്പ് തീയതി പ്രഖ്യാപിച്ചു. നവംബർ 3, 7 തീയതികളിലായാണ് ഉപതെരഞ്ഞെടുപ്പ് നടക്കുകയെന്നാണ് തെരഞ്ഞെടുപ്പ് കമ്മീഷൻ വ്യക്തമാക്കിയിരിക്കുന്നത്.

10 സംസ്ഥാനങ്ങളിൽ നിന്നുള്ള 54 നിയമസഭാ സീറ്റുകളിലേക്ക് നവംബർ മൂന്നിനാണ് ഉപതെരഞ്ഞെടുപ്പ് നടക്കുക. ബിഹാറിൽ നിന്നുള്ള ഒരു പാർലമെന്‍റ് സീറ്റിലേക്കും മണിപ്പൂരിൽ നിന്നുള്ള രണ്ട് നിയമസഭാ സീറ്റുകളിലേക്കും നവംബർ ഏഴിനാണ് ഉപതെരഞ്ഞെടുപ്പ്. വോട്ടെണ്ണൽ നവംബർ പത്തിന് നടക്കുമെന്നും തെരഞ്ഞെടുപ്പ് കമ്മീഷൻ വ്യക്തമാക്കി.

Also Read : ശിവസേന - ബിജെപി കൂടിക്കാഴ്ച്ച 'രാഷ്ട്രീയം' തന്നെയെന്ന് ബിജെപി; മഹാരാഷ്ട്രയിൽ പുതിയ നീക്കം?

ഛത്തീസ്ഗഡ്, ഗുജറാത്ത്, ജാർഖണ്ഡ്, ഹരിയാന, കർണാടക, മധ്യപ്രദേശ്, മണിപ്പൂർ, നാഗാലാൻഡ്, ഒഡീഷ, തെലങ്കാന, ഉത്തർപ്രദേശ് എന്നീ സംസ്ഥാനങ്ങളിലാണ് ഉപതെരഞ്ഞെടുപ്പ് നടക്കുന്നത്. മധ്യപ്രദേശിലാണ് ഏറ്റവും കൂടുതൽ മണ്ഡലങ്ങളിൽ തെരഞ്ഞെടുപ്പ് നടക്കാനിരിക്കുന്നത്. കോൺഗ്രസ് വിട്ട് ബിജെപിയിലേക്ക് ജ്യോതിരാദിത്യ സിന്ധ്യയും കൂട്ടരും ചേക്കേറിയ സാഹചര്യത്തിൽ ഒഴിവ് വന്ന സീറ്റുകളിലാണ് ഇവിടെ തെരഞ്ഞെടുപ്പ്.

മധ്യപ്രദേശിൽ 28 മണ്ഡലങ്ങളിലാണ് ഉപതെരഞ്ഞെടുപ്പ് നടക്കുക. ഗുജറാത്തിലെ എട്ട് മണ്ഡലങ്ങളും ഉത്തർപ്രദേശിലെ ഏഴ് മണ്ഡലങ്ങളും നവംബർ മൂന്നിന് ജനവിധി രേഖപ്പെടുത്തും.

Also Read : സംസ്ഥാന സര്‍ക്കാരിന്‍റെ ആവശ്യം അംഗീകരിച്ചു; ചവറ, കുട്ടനാട് ഉപതെരഞ്ഞെടുപ്പുകളില്ല

അതേസമയം കേരളത്തിലേതുൾപ്പെടെ ഏഴ് നിയമസഭാ മണ്ഡലങ്ങളിൽ നിലവിൽ തെരഞ്ഞെടുപ്പ് നടത്തേണ്ടതില്ലെന്നും കമ്മീഷൻ തീരുമാനിച്ചു. അസം, കേരള, തമിഴ്നാട് എന്നീ സംസ്ഥാനങ്ങളിൽ നിന്നുള്ള രണ്ട് വീതം സീറ്റുകളിലും ബെംഗാളിലെ ഒരു സീറ്റിലുമാണ് നിലവിൽ ഉപതെരഞ്ഞെടുപ്പ് നടത്തേണ്ടതില്ലെന്ന് തീരുമാനിച്ചിരിക്കുന്നത്. കേരളത്തിൽ ചവറ, കുട്ടനാട് നിയമസഭാ മണ്ഡലങ്ങളിലെ തെരഞ്ഞെടുപ്പാണ് സംസ്ഥാനത്തിന്‍റെ ആവശ്യം പരിഗണിച്ച് നടത്തേണ്ടതില്ലെന്ന് തീരുമാനിച്ചത്.