തിത്ത്‍ലി ആഞ്ഞടിക്കുന്നു; ആന്ധ്രയില്‍ എട്ട് മരണം

ഹൈദരാബാദ്: ആന്ധ്രയില്‍ തിത്ത്‍ലി അതിതീവ്ര ചുഴലിക്കാറ്റായി ആഞ്ഞടിക്കുന്നു. ചുഴലിക്കാറ്റില്‍ എട്ട് പേര്‍ക്ക് ജീവന്‍ നഷ്ടമായി. ആന്ധ്രയിലെ ശ്രീകുളം, വിജയനഗരം എന്നീ ജില്ലകളിലാണ് തിത്ത്‍ലി ആളുകളുടെ ജീവനെടുത്തത്.

ഒ‍ഡീഷയിലും ചുഴലിക്കാറ്റ് കനത്ത നാശം വിതച്ചു. ഒഡീഷയിലെ ഗോപാൽപൂരിൽ 150 കിലോമീറ്റര്‍ വേഗതയിൽ കാറ്റ് വീശിയതായാണ് റിപ്പോര്‍ട്ട്. സുരക്ഷാ മുൻകരുതലായി മൂന്ന് ലക്ഷം പേരെ പ്രദേശത്തുനിന്ന് മാറ്റിപ്പാര്‍പ്പിച്ചിരുന്നു.

165 കിലോമീറ്റര്‍ വരെ വേഗതയിൽ കാറ്റടിക്കുമെന്ന് കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്‍കിയിരുന്നു. ഒഡീഷയുടെ തീരപ്രദേശത്ത് മരങ്ങളും വൈദ്യുതി പോസ്റ്റുകളും കടപുഴകിയെന്നാണ് റിപ്പോര്‍ട്ട്. പലയിടങ്ങളിലും റോഡ് ഗതാഗതവും താറുമാറായെന്നാണ് റിപ്പോര്‍ട്ടുകള്‍. ഗഞ്‍‍ജം, ഗജപതി, പുരി, ഖുര്‍ദ, ജഗദ്‍‍സിങ്പൂര്‍ എന്നിവിടങ്ങളിൽ ശക്തമായ മഴയും പെയ്യുന്നുണ്ട്.