രാജ്യത്ത് വീണ്ടും കൊവിഡ് മരണം; ബംഗാളിൽ ചികിൽസയിലിരുന്നയാൾ മരിച്ചു

ന്യൂഡൽഹി: രാജ്യം കൊവിഡ് ഭീതിയിൽ തുടരുന്നതിനിടെ വീണ്ടും മരണം. ബംഗാളിൽ ചികിത്സയിൽ കഴിഞ്ഞ 57കാരനാണ് മരിച്ചത്. ഇതോടെ ഇന്ത്യയിൽ കോവിഡ് ബാധിച്ചു മരിച്ചവരുടെ എണ്ണം എട്ടായി. സംസ്ഥാനത്തെ ആദ്യ കൊവിഡ് മരണമാണ് റിപ്പോർട്ട് ചെയ്‌തത്.

Also Read: കാസര്‍കോട് പൂര്‍ണ്ണമായും അടക്കും, മറ്റ് ജില്ലകളില്‍ ഭാഗികം

ഇയാളും കുടുംബവും ഇറ്റലിയിൽ നിന്ന് മടങ്ങിയെത്തിയതാണെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. നാട്ടിൽ തിരിച്ചെത്തിയതിന് പിന്നാലെ ആരോഗ്യപ്രശ്‌നങ്ങൾ നേരിട്ടു. ഇതോടെ കൊൽക്കത്തയിലെ ആശുപത്രിയിൽ ചികിൽസ തേടി. പരിശോധനയിൽ കൊറോണ വൈറസ് സ്ഥിരീകരിക്കുകയും ചെയ്‌തു. ഇതിനിടെയാണ് മരണം സംഭവിച്ചത്. ഹൃദയ സ്തംഭനമാണ് മരണകാരണം എന്നാണ് അധികൃതർ നൽകുന്ന വിവരം.


ഇയാളുടെ മകൻ ഇപ്പോഴും ഇറ്റലിയിൽ തുടരുകയാണെന്നാണ് റിപ്പോർട്ട്. രാജ്യത്തെ ഇതുവരെ 415 പേർക്കു കൊറോണ വൈറസ് സ്ഥിരീകരിച്ചിട്ടുണ്ടെന്ന് കേന്ദ്ര ആരോഗ്യ മന്ത്രാലയം അറിയിച്ചു. ഇന്നു 19 പേർക്ക് രോഗം സ്ഥിരീകരിച്ചു. വരും ദിവസങ്ങളിൽ കൂടുതൽ കേസുകൾ റിപ്പോർട്ട് ചെയ്യാനുള്ള സാധ്യതകൾ കൂടുതാണെന്നാണ് റിപ്പോർട്ട്.