വയനാട്ടിൽ ഉടൻ ഉപതെരഞ്ഞെടുപ്പില്ല; കർണാടക നിയമസഭ തെരഞ്ഞെടുപ്പ് തീയതി പ്രഖ്യാപിച്ച് കമ്മീഷൻ

ന്യൂഡൽഹി: കർണാടക നിയമസഭ തെരഞ്ഞെടുപ്പിനൊപ്പം വയനാട് ലോക്സഭ മണ്ഡലത്തിൽ ഉപതെരഞ്ഞെടുപ്പ് ഇല്ല. ഇന്ന് ന്യൂഡൽഹിയിൽ നടത്തിയ വാർത്താ സമ്മേളനത്തിലാണ് കർണാടക തെരഞ്ഞെടുപ്പ് തീയതി കമ്മീഷൻ പ്രഖ്യാപിച്ചത്. ഇതിനൊപ്പം വയനാട്ടിലെ പ്രഖ്യാപനവും ഉണ്ടായേക്കുമെന്ന് അഭ്യൂഹങ്ങളുണ്ടായിരുന്നെങ്കിലും ഇതുസംബന്ധിച്ച പ്രഖ്യാപനങ്ങളൊന്നും ഉണ്ടായില്ല.2023 ഫെബ്രുവരി വരെയുള്ള ഒഴിവുകളാണ് പരിഗണിച്ചതെന്ന് തെരഞ്ഞെടുപ്പ് കമ്മീഷൻ വ്യക്തമാക്കി. വയനാട്ടിലെ ഉപതെരഞ്ഞെടുപ്പുമായി ബന്ധപ്പെട്ട ചോദ്യത്തിന് ഒഴിവുവന്ന മണ്ഡലത്തിൽ ആറ് മാസത്തിനകം തെരഞ്ഞെടുപ്പ് നടത്തിയാൽ മതിയെന്നാണ് കമ്മീഷൻ വാർത്താ സമ്മേളനത്തിൽ മറുപടി നൽകിയത്. കോടതി നടപടികൾ നിരീക്ഷിക്കുകയാണെന്നും കമ്മീഷൻ പറഞ്ഞു.

Also Read : കർണാടകയിൽ മേയ് പത്തിന് തെരഞ്ഞെടുപ്പ്; 13ന് വോട്ടെണ്ണൽ


രാഹുൽ ഗാന്ധിയുടെ ലോക്സഭ അംഗത്വം റദ്ദാക്കിയ സാഹചര്യത്തിൽ മണ്ഡലത്തിൽ ഉടൻ തന്നെ ഉപതെരഞ്ഞെടുപ്പ് പ്രഖ്യാപിച്ചേക്കുമെന്നായിരുന്നു റിപ്പോർട്ടുകൾ. അതേസമയം നിലവിൽ ഒഴിഞ്ഞുകിടക്കുന്ന മറ്റു ലോക്സഭ മണ്ഡലങ്ങളിലെയും നിയമസഭ മണ്ഡലങ്ങളിലെയും ഉപതെരഞ്ഞെടുപ്പ് ഇന്ന് പ്രഖ്യാപിച്ചിട്ടുണ്ട്.

കര്‍ണാടക നിയമസഭയിലേക്ക് ഒറ്റഘട്ടമായാണ് തെരഞ്ഞെടുപ്പ്‌ നടക്കുക. മേയ് 10നാണ് തെരഞ്ഞെടുപ്പ്. മേയ്13നാണ് വോട്ടെണ്ണല്‍. 224 നിയമസഭാ മണ്ഡലങ്ങളിലായി 5.21 കോടി വോട്ടര്‍മാരാണ് കര്‍ണാടകയിലുള്ളത്. 58,282 പോളിങ് സ്‌റ്റേഷനുകളാണ് ഇത്തവണ തെരഞ്ഞെടുപ്പിനായി ഒരുക്കുക. 2018-19-ന് ശേഷം 9.17 ലക്ഷം ആദ്യ വോട്ടര്‍മാരുടെ വര്‍ധനവുണ്ടായി. ഏപ്രില്‍ ഒന്നിന് 18 വയസ്സ് തികയുന്ന എല്ലാ യുവ വോട്ടര്‍മാര്‍ക്കും കര്‍ണാടക നിയമസഭാ തെരഞ്ഞെടുപ്പില്‍ വോട്ട് ചെയ്യാം.

ലക്ഷദ്വീപ് എം പി മുഹമ്മദ് ഫൈസലിന്‍റെ അയോഗ്യത പിൻവലിച്ചു


കർണാടക നിയമസഭ തെരഞ്ഞെടുപ്പ് വിജ്ഞാപനം ഏപ്രില്‍ 13നാണ് പുറപ്പെടുവിക്കുക. ഏപ്രില്‍ 20ആണ് നാമനിര്‍ദേശ പത്രിക സമര്‍പ്പിക്കുന്നതിനുള്ള അവസാന തീയതി. 21ന് സൂക്ഷമപരിശോധന നടക്കും. നാമനിര്‍ദശേ പത്രിക പിന്‍വലിക്കാനുള്ള അവസാന തീയതി ഏപ്രില്‍ 24 ആണ്.

കോണ്‍ഗ്രസും ജെഡിഎസും തെരഞ്ഞെടുപ്പ് പ്രഖ്യാപനത്തിന് മുമ്പേ ആദ്യഘട്ട സ്ഥാനാര്‍ഥി പട്ടിക ഇറക്കിയിട്ടുണ്ട്. തെരഞ്ഞെടുപ്പ് പ്രഖ്യാപനത്തിന് ശേഷം ബിജെപിയുടെ സ്ഥാനാര്‍ഥികളെ പ്രഖ്യാപിക്കുമെന്നാണ് മുഖ്യമന്ത്രി ബസവരാജ് ബൊമ്മെ അറിയിച്ചിരിക്കുന്നത്.