ജോധ്പൂർ: രാജസ്ഥാനിലെ ജോധ്പൂരിൽ ട്രക്കും ജീപ്പും കൂട്ടിയിടിച്ച് 11 പേർ മരിച്ചു. ബലോത്ര-ഫലോഡി ഹൈവേയിലുള്ള ഷെര്‍ഗാ ഏരിയയിലാണ് അപകടം നടന്നത്. സംഭവത്തിൽ മൂന്നു പേർക്ക് പരിക്കേറ്റിട്ടുമുണ്ട്.
ഒരു കുട്ടിയും ആറ് സ്ത്രീകളും നാല് പുരുഷന്മാരുമാണ് അപകടത്തില്‍ മരിച്ചത്. ഇവരെയെല്ലാം തിരിച്ചറിഞ്ഞിട്ടുണ്ട്. നവദമ്പതികളും ബന്ധുക്കളും ഉൾപ്പെടെയുള്ളവരാണ് വാഹനാപകടത്തിൽ കൊല്ലപ്പെട്ടത്. ഫെബ്രുവരി 27നായിരുന്നു ഇവരുടെ വിവാഹം കഴിഞ്ഞത്. പൊഖ്രാനിലെ പ്രശസ്തമായ ഒരുക്ഷേത്രത്തിലേക്ക് പോവുകയായിരുന്നു ഇവർ.
Also Read: കൊറോണ: മരിച്ചയാളുടെ കുടുംബം അധികൃതരുടെ നിർദേശങ്ങൾ പാലിച്ചിരുന്നില്ല; പ്രതിസന്ധി
പോലീസും രക്ഷാപ്രവര്‍ത്തകരും ചേർന്നാണ് ഇവരെ പുറത്തെടുത്തത്. പരിക്കേറ്റ മൂന്നുപേരെയും ജോധ്പൂരിലെ ആശുപത്രിയിൽ പ്രവേശിപ്പിച്ചിരിക്കുകയാണ്. ക്രെയിൻ ഉപയോഗിച്ച് വാഹനമുയർത്തിയാണ് അടിയിൽപ്പെട്ടവരുടെ മൃതദേഹങ്ങൾ പുറത്തെടുത്ത്.
സംഭവത്തില്‍ രാജസ്ഥാന്‍ മുഖ്യമന്ത്രി അശോക് ഗലോട്ട് അനുശോചനം അറിയിച്ചു. 'ജോധ്പൂരിലെ ഷെർഗ പ്രദേശത്തെ ബലോത്ര-ഫലോഡി മെഗാ ഹൈവേയിൽ 11 പേർക്ക് ജീവൻ നഷ്ടമായതില്‍ അതിയായ ദുഃഖം രേഖപ്പെടുത്തുന്നു. കുടുംബാഗങ്ങളെ എന്‍റെ അനുശോചനം അറിയിക്കുന്നു. പരിക്കേറ്റവർ വേഗത്തിൽ സുഖം പ്രാപിക്കട്ടെയെന്നും' മുഖ്യമന്ത്രി ട്വീറ്റ് ചെയ്തു.