മല്യക്ക് എൻഫോഴ്സ്മെന്‍റ് നോട്ടീസ്; ഏപ്രിൽ രണ്ടിന് ഹാജരാവണം

ന്യുഡല്‍ഹി: വായ്പ തിരിച്ചടക്കാതെ രാജ്യം വിട്ട കേസില്‍ ഏപ്രില്‍ രണ്ടിന് നേരിട്ട് ഹാജരാകണമെന്ന് കാട്ടി മദ്യരാജാവ് വിജയ് മല്യയ്ക്ക് എന്‍ഫോഴ്‌സ്‌മെന്റ് ഡയറക്ടറേറ്റ് വീണ്ടും നോട്ടീസ് അയച്ചു. വ്യക്തിപരമായ നിക്ഷേപങ്ങള്‍, ആസ്തി, കഴിഞ്ഞ അഞ്ചു വര്‍ഷത്തെ ഇന്‍കം ടാക്‌സ് റിട്ടേണ്‍സ്, പാസ്‌പോര്‍ട്ട് എന്നിവ ഹാജരാക്കണമെന്ന് കോടതി നിര്‍ദേശം നല്‍കിയിട്ടുണ്ട്. ഹാജരാകാൻ കൂടുതല്‍ സമയം വേണമെന്ന് മല്യ കോടതിയോട് കഴിഞ്ഞ ദിവസം ആവശ്യപ്പെട്ടിരുന്നു. ഇതേ തുടർന്നാണ് സമയം നീട്ടി നൽകിയത്. ഇന്നായിരുന്നു മല്യ കോടതിയിൽ ഹാജരാവേണ്ടിയിരുന്നത്.

എസ്ബിഐ അടക്കം വിവിധ ബാങ്കുകൾക്ക് ലോൺ തിരിച്ചടക്കാനുള്ള മല്യ സേവന നികുതി ഇനത്തിലും പണം അടയ്ക്കാനുണ്ട്. കള്ളപ്പണം വെളുപ്പിക്കല്‍ തടയാനുള്ള നിയമപ്രകാരമാണ് മല്യക്ക് കോടതി നോട്ടീസ് അയച്ചിരിക്കുന്നത്.

അതേ സമയം വാങ്ങാൻ ആളില്ലാത്തതിനെ തുടർന്ന് വിജയ് മല്യയുടെ കിങ് ഫിഷർ ഹൗസിന്‍റെ വില കുറച്ചു. ഇന്നലെയാണ് മല്യയുടെ ഉടമസ്ഥതയിലുള്ള കിങ് ഫിഷർ ഹൗസ്, എയർബസ് തുടങ്ങിയവ ലേലത്തിന് വെച്ചത്.