ഇവിഎം ചലഞ്ച് ഇന്ന്: ആരോപണങ്ങൾ തെളിയിക്കാൻ അവസരം

ന്യൂഡൽഹി: ഉത്തരാഖണ്ഡ്, പഞ്ചാബ്, ഉത്തർപ്രദേശ് എന്നീ സംസ്ഥാനങ്ങളിലെ തെരഞ്ഞെടുപ്പുകളിൽ ഉപയോഗിച്ച വോട്ടിങ് യന്ത്രങ്ങളിൽ കൃത്രിമം നടന്നിട്ടുണ്ടെന്ന് തെളിയിക്കാൻ രാഷ്ട്രീയ പാർട്ടികൾക്ക് ഇന്ന് അവസരം. തെരഞ്ഞെടുപ്പ് കമ്മീഷൻ അതീവ വിശ്വാസ്യതയോടെ നടത്തുന്ന തെരഞ്ഞെടുപ്പുകളിൽ വോട്ടിങ് യന്ത്രങ്ങളെ വിമർശിക്കുന്നത് ഭരണഘടനാ വിരുദ്ധമാണെന്ന് ഉത്തരാഖണ്ഡ് ഹൈക്കോടതി നിരീക്ഷിച്ചിരുന്നു.

14 വോട്ടിങ് യന്ത്രങ്ങളാണ് ഇന്ന് കോടതിയുടെ നിരീക്ഷണത്തിൽ പരിശോധിക്കുന്നത്. നേരത്തെ വോട്ടിങ് യന്ത്രങ്ങളിൽ കൃത്രിമം നടന്നുവെന്ന് വാദിച്ചത് ആം ആദ്‌മി പാർട്ടി ആയിരുന്നെങ്കിലും തെരഞ്ഞെടുപ്പ് കമ്മീഷൻ അത് തെളിയിക്കാൻ അവസരം നൽകിയപ്പോൾ അവർ വെല്ലുവിളി ഏറ്റെടുത്തില്ല. എൻസിപിയും സിപിഎമ്മുമാണ് ഇന്ന് യന്ത്രങ്ങളുടെ പരിശോധനയിൽ പങ്കെടുക്കുന്നത്.

രാവിലെ പത്ത് മണി മുതൽ ഉച്ച തിരിഞ്ഞ് രണ്ടു മണി വരെയാണ് പാർട്ടികൾക്ക് അവസരം നൽകിയിരിക്കുന്നത്. എല്ലാ വോട്ടുകളും ഒരു സ്ഥാനാർഥിക്ക് തന്നെ ലഭിച്ചുവെന്ന ആരോപണവും ഇന്ന് പാർട്ടികൾക്ക് തെളിയിക്കാം. എത്ര പ്രാവശ്യം വേണമെങ്കിലും വോട്ടിങ് ബട്ടൺ അമർത്തി പരിശോധിക്കാം. മതർബോർഡ്, ചിപ്പ്, സര്‍ക്യൂട്ട് എന്നിവയും പാർട്ടികൾക്ക് പരിശോധിക്കാമെന്നും കമ്മീഷൻ അറിയിച്ചു.

EVM challenge held today in Delhi

Political parties are given the opportunity to prove the criticisms raised against EVMs.