"താൻ റോ മേധാവിയെയും കണ്ടിട്ടുണ്ട്, അതും ഗൂഢാലോചനയാണോ"

ന്യൂഡൽഹി: കോണ്‍ഗ്രസുമായി ചേര്‍ന്ന് ഗുജറാത്ത് തിരഞ്ഞെടുപ്പ് അട്ടിമറിക്കാൻ പാക്കിസ്ഥാൻ ശ്രമിച്ചെന്ന പ്രധാനമന്ത്രി നരേന്ദ്ര മോദിയുടെ ആരോപണത്തിനെതിരെ പാക്കിസ്ഥാൻ മുൻ വിദേശകാര്യമന്ത്രി ഖുര്‍ഷിത് മുഹമ്മദ് കസൂരി. കോണ്‍ഗ്രസ് നേതാക്കളുമായി മാത്രമല്ല, താൻ ഇന്ത്യയുടെ രഹസ്യാന്വേഷണ ഏജൻസിയായ റോയുമായും കൂടിക്കാഴ്ച നടത്തിയിട്ടുണ്ടെന്നും അത് ഗൂഢാലോചനയാണോ എന്നും കസൂരി ചോദിച്ചു.

കസൂരിയുടെ ബഹുമാനാര്‍ത്ഥം ഈ മാസം ആറാം തീയതി കോണ്‍ഗ്രസ് നേതാവ് മണിശങ്കര്‍ അയ്യരുടെ വീട്ടിൽ നടത്തിയ വിരുന്നിനെക്കുറിച്ചായിരുന്നു നരേന്ദ്ര മോദിയുടെ ആരോപണം. മൻമോഹൻ സിങ് ഉള്‍പ്പെടെ കോണ്‍ഗ്രസിന്‍റെ മുതിര്‍ന്ന നേതാക്കളും, മുൻ പാക്കിസ്ഥാൻ മന്ത്രിമാരും നയതന്ത്രജ്ഞരും മാധ്യമപ്രവര്‍ത്തരും പങ്കെടുത്ത ചടങ്ങിനെപ്പറ്റി ഒരു ഇംഗ്ലീഷ് ചാനൽ നല്‍കിയ വാര്‍ത്ത ബിജെപി നേതൃത്വം ഏറ്റുപിടിക്കുകയായിരുന്നു.

മോദിയുടെ ആരോപണങ്ങള്‍ അടിസ്ഥാനരഹിതമാണെന്നും ഇതുവഴി വോട്ടുപിടിക്കാനാവുമെന്നാണ് അവരുടെ വിചാരമെന്നും കസൂരി പാക്കിസ്ഥാൻ ടെലിവിഷൻ ചാനലിന് അനുവദിച്ച അഭിമുഖത്തിൽ പറഞ്ഞു.

ഇന്ത്യ– പാക്കിസ്ഥാൻ ബന്ധം മെച്ചപ്പെടുത്താനുള്ള ശ്രമങ്ങളിൽ താനും മൻമോഹൻ സിങ്ങും പങ്കാളികളായിരുന്നുവെന്നും ഈ ബന്ധത്തിന്റെ പുറത്താണ് മൻമോഹൻ സിങ്ങിനെ വിരുന്നിലേക്കു ക്ഷണിച്ചതെന്നും കസൂരി വ്യക്തമാക്കി.