അഹമ്മദാബാദ്: ഗുജറാത്ത് നിയമസഭ തെരഞ്ഞെടുപ്പിൻ്റെ അന്തിമഘട്ടം ഇന്ന് അവസാനിക്കുന്ന സാഹചര്യത്തിൽ എക്സിറ്റ് പോൾ ഫലങ്ങൾ ഇന്ന് വൈകുന്നേരത്തോടെ എത്തും. ഗുജറാത്ത്, ഹിമാചൽ പ്രദേശ് സംസ്ഥാനങ്ങളിലെ എക്സിറ്റ് പോൾ ഫലങ്ങളാണ് ഇന്ന് എത്തുന്നത്. 18നാണ് ഇരു സംസ്ഥാനങ്ങളിലെയും വോട്ടെണ്ണൽ.
ഗുജറാത്ത് തെരഞ്ഞെടുപ്പിൻ്റെ രണ്ടാംഘട്ടത്തിൽ 89 നിയമസഭ മണ്ഡലങ്ങളിലേക്കാണ് വോട്ടെടുപ്പ് നടക്കുന്നത്. നവംബർ ഒമ്പതിന് ആയിരുന്നു ഹിമാചൽ പ്രദേശിൽ വോട്ടെടുപ്പ് നടന്നത്. ബി ജെ പിയും കോൺഗ്രസും തമ്മിൽ കനത്ത പോരാട്ടം നടന്ന ഗുജറാത്തിൽ എക്സിറ്റ് പോൾ ഫലം എന്താണെന്ന് അറിയാൻ കാത്തിരിക്കുകയാണ്.
ഗുജറാത്ത് തെരഞ്ഞെടുപ്പിൻ്റെ രണ്ടാംഘട്ടത്തിൽ 2.22 കോടി ആളുകൾ 851 സ്ഥാനാർത്ഥികളുടെ വിധി എഴുതും. രാവിലെ എട്ടുമണിക്ക് ആരംഭിച്ച വോട്ടെടുപ്പ് വൈകുന്നേരം അഞ്ചുമണിക്ക് അവസാനിക്കും. ബനസ്കന്ദ, പഠാൻ, സബർകന്ദ, മെഹ്സാന, ഗാന്ധിനഗർ, അഹ്മദാബാദ്, ആരവള്ളി, മഹിസാഗർ, പഞ്ച്മഹൽ, ദാഹോദ്, ഖേദ, ആനന്ദ്, വഡോദര, ഛോട്ട ഉദേപുർ ജില്ലകളിലാണ് ഇന്ന് തെരഞ്ഞെടുപ്പ്. 14, 523 സ്ഥലങ്ങളിലായി 25, 575 പോളിങ് ബൂത്തുകളാണ് തയ്യാറാക്കിയിരിക്കുന്നത്.