ഒടുവിൽ നടപടി; ബിജെപി എംഎൽഎയ്ക്ക് ഫേസ്‌ബുക്ക് വിലക്കേർപ്പെടുത്തി, തീരുമാനം വിദ്വേഷ പ്രസംഗത്തിൻ്റെ പേരിൽ

ന്യൂഡൽഹി: ഫേസ്‌ബുക്ക് ഇന്ത്യ ബിജെപി നേതാക്കൾക്ക് അകമഴിഞ്ഞ് സഹായം നൽകുന്നുവെന്ന ആരോപണം ശക്തമായി നിലനിൽക്കുന്നതിനിടെ വിദ്വേഷ ഉള്ളടക്കം പോസ്‌റ്റ് ചെയ്‌ത ബിജെപി നേതാവും തെലങ്കാന എംഎൽഎയുമായ ടി രാജ സിങ്ങിന് ഫേസ്‌ബുക്ക് വിലക്കേർപ്പെടുത്തി.

Also Read: ബിജെപിക്ക് അകമഴിഞ്ഞ് സഹായം നൽകിയോ? നിലപാട് വ്യക്തമാക്കി ഫേസ്‌ബുക്ക് ഇന്ത്യ മേധാവി

വിദ്വേഷവും അക്രമവും പ്രോത്സാഹിപ്പിക്കുന്ന ഉള്ളടക്കങ്ങൾ പോസ്‌റ്റ് ചെയ്‌ത സാഹചര്യത്തിലാണ് രാജ സിങ്ങിന് വിലക്കേർപ്പെടുത്തിയതെന്ന് ഫേസ്‌ബുക്ക് വക്‌താവ് അറിയിച്ചു. നിയങ്ങളും നിർദേശങ്ങളും ലംഘിക്കുന്നവർക്ക് എതിരെ ഫേസ്‌ബുക്ക് നടപടിയെടുക്കും. അതനുസരിച്ചാണ് ഫേസ്‌ബുക്കിൻ്റെ പ്രവർത്തനം. നിർദേശങ്ങളും ഫേസ്‌ബുക്ക് നയങ്ങളും ലംഘിച്ചതോടെയാണ് അദ്ദേഹത്തിൻ്റെ അക്കൗണ്ട് നീക്കം ചെയ്യേണ്ടി വന്നതെന്നും ഫേസ്‌ബുക്ക് ഇന്ത്യ അധികൃതർ പറഞ്ഞു.

ബിജെപി നേതാക്കൾ നടത്തുന്ന വിദ്വേഷ പ്രസംഗങ്ങൾ നീക്കം ചെയ്യാൻ ഫേസ്‌ബുക്ക് തയ്യാറാകുന്നില്ലെ ആരോപണം ശക്തമായിരിക്കെയാണ് ടി രാജ സിങ്ങിൻ്റെ അക്കൗണ്ട് നീക്കം ചെയ്‌തത്. ഇദ്ദേഹം നടത്തിയ പ്രസ്‌താവനകൾ നീക്കം ചെയ്യാൻ ഫേസ്‌ബുക്ക് മടികാണിച്ചതോടെ കോൺഗ്രസ് അടക്കമുള്ള പ്രതിപക്ഷ പാർട്ടികൾ ഫേസ്‌ബുക്കിനെതിരെ രംഗത്ത് വന്നിരുന്നു.

തനിക്ക് ഫേസ്‌ബുക്കിൽ അക്കൗണ്ടില്ലെന്ന് കഴിഞ്ഞ മാസം രാജ സിങ് വ്യക്തമാക്കിയിരുന്നു. തൻ്റെ പേരിലുള്ളത് വ്യാജമായ അക്കൗണ്ടുകളാണ്. ഇത്തരം പേജുകളിൽ വരുന്ന പോസ്‌റ്റുകൾക്ക് താൻ ഉത്തരവാദിയല്ലെന്നും ഒരു വീഡിയോ സന്ദേശത്തിലൂടെ അദ്ദേഹം വ്യക്തമാക്കിയിരുന്നു.

Also Read: അതിർത്തിയിൽ ആശങ്ക തുടരുന്നതിനിടെ കരസേന മേധാവി ലഡാഖിൽ

ഫേസ്‌ബുക്ക് ഇന്ത്യ ബിജെപിക്ക് അനുകൂലമായി പ്രവർത്തിച്ചെന്ന റിപ്പോർട്ട് പുറത്ത് വിട്ടത് വാൾ സ്‌ട്രീറ്റ് ജേണലാണ്. കഴിഞ്ഞ ലോക്‌സഭാ തെരഞ്ഞെടുപ്പിൽ ഫേസ്‌ബുക്ക് ഇന്ത്യ ബിജെപിക്ക് എതിരെ ശബ്‌ദമുയർത്തിയ ഫേസ്‌ബുക്ക് പേജുകൾ നിർജീവമാക്കി. ബിജെപിക്ക് അനുകൂലമായ സാഹചര്യമാണ് സമൂഹമാധ്യമങ്ങളിലൂടെ ഫേസ്‌ബുക്ക് ഇന്ത്യ ഒരുക്കിയതെന്നുമാണ് വാൾ സ്‌ട്രീറ്റ് ജേണൽ റിപ്പോർട്ട് ചെയ്‌തത്. ഫേസ്ബുക്ക് ഇന്ത്യയുടെ പോളിസി മേധാവി അംഖി ദാസ് ആണ് ഇക്കാര്യം വ്യക്തമാക്കിയതെന്നാണ് വാൾ സ്‌ട്രീറ്റ് ജേണൽ റിപ്പോർട്ട് ചെയ്‌തത്.