ഫാം ബില്ലിൽ പ്രതിഷേധം; കേന്ദ്ര മന്ത്രി ഹർസിമ്രത് കൗ‍ര്‍ ബാദൽ രാജിവെച്ചു

ന്യൂഡൽഹി: വിവാദമായ ഫാം ബിൽ ലോക്സഭയിൽ അവതരിപ്പിച്ചതിൽ പ്രതിഷേധിച്ച് കേന്ദ്ര മന്ത്രി ഹ‍ര്‍സിമ്രത് കൗ‍ര്‍ ബാദൽ കേന്ദ്ര മന്ത്രിസഭയിൽ നിന്നും രാജിവെച്ചു. ബിജെപിയുടെ സഖ്യ കക്ഷിയായ ശിരോമണി അകാലിദളിൽ നിന്നുള്ള മന്ത്രിയാണ് ഇവർ. ഫാം ബിൽ ലോക്സഭയിൽ അവതരിപ്പിച്ച് മണിക്കൂറുകൾക്കുള്ളിലാണ് മന്ത്രിയുടെ രാജി.

Also Read: കുഞ്ഞിന് ശാരീരിക വൈകല്യം; ഗർഭം അലസിപ്പിക്കാനാകില്ലെന്ന് ബോംബെ ഹൈക്കോടതി

ബിൽ അവതരിപ്പിച്ചതിനു പിന്നാലെ മന്ത്രിയുടെ ഭർത്താവും പാർട്ടിയുടെ നേതാവുമായ സുഖ്ബിർ ബാദൽ ബില്ലിനെ എതിർക്കുമെന്ന് വ്യക്തമാക്കിയിരുന്നു. പഞ്ചാബ്, ഹരിയാന എന്നിവിടങ്ങളിൽ ബില്ലിനെതിരെ കടുത്ത പ്രതിഷേധമാണ് ഉയരുന്നത്. ബിൽ അവതരിപ്പിക്കുന്നത് മാറ്റിവെക്കണമെന്ന് ശിരോമണി അകാലിദൾ ആവശ്യപ്പെട്ടിരുന്നു.

Also Read: കര്‍ണാടക ബിജെപി എംപി അശോക് ഗസ്തി കൊവിഡ് ബാധിച്ച് മരിച്ചു

ബിൽ കാർഷിക മേഖലയിലെ വൻ പരിഷ്കരണമാണെന്നാണ് ബിജെപി അവകാശപ്പെടുന്നത്. തുടക്കത്തിൽ ബില്ലിനെ പിന്തുണച്ച ശിരോമണി അകാലിദൾ കടുത്ത പ്രതിഷേധങ്ങൾ ഉയർന്നുവരാൻ തുടങ്ങിയതിന്റെ പശ്ചാത്തലത്തിലാണ് പിന്മാറിയത്. കർഷകരുടെ പ്രതിഷേധം കണക്കിലെടുത്ത് ബിൽ അവതരിപ്പിക്കുന്നത് മാറ്റിവെക്കണമെന്ന് കേന്ദ്രത്തോട് ആവശ്യപ്പെടുകയും ചെയ്തു. ഇതോടെ ബില്ലുകൾക്കുള്ള പിന്തുണ പിൻവലിക്കാനും പാർലമെന്റിൽ എതിർത്ത് വോട്ട് ചെയ്യാനും പാർട്ടി തീരുമാനിച്ചു.