കർഷക മാർച്ച് യുപിയിലും: 'ചലോ ലഖ്‌നൗ' തലസ്ഥാനത്തേക്ക്

ലഖ്‌നൗ: യുപി കിസാൻ സഭയുടെ നേതൃത്വത്തിൽ 60 ജില്ലകളിൽ നിന്നുള്ള 20000 ത്തോളം കർഷകർ 'ചലോ ലഖ്‌നൗ' എന്ന പേരിൽ തലസ്ഥാനത്തേക്ക് മാർച്ച് നടത്തും. മഹാരാഷ്ട്രയിലെ കർഷക സമരത്തിന് സമാനമായി തന്നെയാണ് ഉത്തർപ്രദേശിലും മാർച്ച് സംഘടിപ്പിക്കുന്നത്. രാജ്യം മുഴുവൻ കർഷക പ്രക്ഷോഭങ്ങൾ ശക്തമാക്കുന്നതിന്‍റെ ഭാഗമായാണ് മാർച്ച് സംഘടിപ്പിക്കുന്നത്. രാവിലെ പതിനൊന്നോടെ ചർബാഗ് റയിൽവേ സ്റ്റേഷനു സമീപത്തുനിന്ന് ആരംഭിക്കുന്ന മാർച്ച് ആറു കിലോമീറ്റർ പിന്നിട്ട് ലക്ഷ്‍മൺ മേള ഗ്രൗണ്ടിൽ എത്തിച്ചേരും.

കാർഷിക കടങ്ങൾ എഴുതിത്തള്ളുക, കാര്‍ഷികോല്‍പന്നങ്ങള്‍ക്ക് ഉൽപാദനച്ചെലവിന്‍റെ ഒന്നരമടങ്ങ് താങ്ങു വില നൽകുക, വൈദ്യുതി മേഖലയിലെ സ്വകാര്യവൽക്കരണം അവസാനിപ്പിക്കുക, പശു സംരക്ഷകർ കർഷകരെ അക്രമിക്കുന്നതിൽ സർക്കാർ ഇടപെടുക, കർഷകർക്ക് പെൻഷൻ നൽകുക, വർഗീയ രാഷ്ട്രീയത്തിന് അവസാനം കുറിക്കുക എന്നിവയാണ് കർഷകർ ഉന്നയിക്കുന്ന ആവശ്യങ്ങൾ.

മഹാരാഷ്ട്രക്ക് പിന്നാലെ ബിജെപി ഭരിക്കുന്ന ഉത്തർപ്രദേശിലും കർഷക പ്രക്ഷോഭം ഉടലെടുക്കുന്നത് പാർട്ടിക്ക് തലവേദനയാകും. കർഷകർ തലസ്ഥാനത്തെത്തി മുഖ്യമന്ത്രിക്ക് നേരിട്ട് നിവേദനം കൈമാറും. എസ്‌പി, ബിഎസ്‌പി, കോൺഗ്രസ് പാർട്ടികൾ സമരത്തിന് പിന്തുണ അറിയിച്ചു. ഉത്തർപ്രദേശിന് പുറമെ മധ്യപ്രദേശിലും രാജസ്ഥാനിലും കർഷക പ്രക്ഷോഭങ്ങൾ തുടരും.