അത്താഴം ആരുണ്ടാക്കുമെന്ന് തർക്കം: കാമുകി കാമുകനെ കൊന്നു

ന്യൂഡൽഹി: അത്താഴമുണ്ടാക്കുന്നതിനെ ചൊല്ലിയുണ്ടായ തർക്കത്തെ തുടർന്ന് നൈജീരിയൻ പൗരനെ കാമുകി കുത്തിക്കൊന്നു.ദക്ഷിണ ഡൽഹിയിലെ ഉത്തം നഗറിൽ ശനിയാഴ്‌ചയാണ്‌ സംഭവം നടന്നത്.
ഇസു എന്ന 30 കാരന്‍റെ കാമുകി എൽവി ഉജ്ജുമയെ പോലീസ് അറസ്റ്റ് ചെയ്തു. ഉജ്ജുമ ആവശ്യപ്പെട്ടത് പ്രകാരം ഇസു ശനിയാഴ്‌ച ഉജ്ജുമയുടെ വീട്ടിലെത്തി. വാക്കുതർക്കത്തെ തുടർന്ന് ഇരുവരും തമ്മിൽ വഴക്കുണ്ടായപ്പോൾ അയൽക്കാർ ഇടപ്പെട്ടു.

എന്നാൽ അയൽക്കാർ പോയ ശേഷം ആര് അത്താഴം ഉണ്ടാക്കുമെന്നതിനെ ചൊല്ലി ഇരുവരും തമ്മിൽ വീണ്ടും തർക്കമുണ്ടാകുകയും വഴക്കാകുകയും ചെയ്തു. ഇസു തന്നെ അടിച്ചെന്നും പേടിച്ചു പോയതിനാൽ അടുക്കളയിൽ നിന്ന് കത്തിയെടുത്തു കൊണ്ട് വന്ന് ഉപദ്രവിക്കരുതെന്ന് പറഞ്ഞെന്നും ഉജ്ജുമ പോലീസിനോട് പറഞ്ഞു. വീണ്ടും ഇസു ആക്രമിക്കാൻ വന്നപ്പോൾ കൈയിൽ ഇരുന്ന കത്തി ഉപയോഗിച്ച് കുത്തുകയായിരുന്നെന്നും ഉജ്ജുമ വെളിപ്പെടുത്തി. സുഹൃത്തുക്കളുടെ സഹായത്തോടെയാണ് ഉജ്ജുമ ഇസുവിനെ ആശുപത്രിയിലെത്തിച്ചത്.

fight over who cooks dinner: girlfriend kills boyfriend

Girlfriend stabs boyfriend to death after a fight over who will cook the dinner