ഹിന്ദുക്കളെല്ലാം ബിജെപിയ്ക്ക് വോട്ട് ചെയ്യണമെന്ന് പ്രസംഗിച്ച മന്ത്രിയ്ക്കെതിരെ കേസ്

ജയ്‍‍പൂര്‍: എല്ലാ ഹിന്ദുക്കളും ബിജെപിയ്ക്ക് വോട്ട് ചെയ്യണമെന്ന് ആഹ്വാനം ചെയ്ത രാജസ്ഥാൻ മന്ത്രിയ്ക്കെതിരെ കേസ്. നഗരവികസനമന്ത്രി ധൻസിങ് റാവത്ത് ആണ് കഴിഞ്ഞ ദിവസം നടന്ന തെരഞ്ഞെടുപ്പ് റാലിയിൽ വിവാദപ്രസ്താവന നടത്തിയത്.

പെരുമാറ്റ ചട്ടലംഘനം നടത്തിയതിന് റിട്ടേണിങ് ഓഫീസര്‍ കഴിഞ്ഞ ദിവസം ധൻസിങ് റാവത്തിന് നോട്ടീസ് അയച്ചിരുന്നു. ഇതിന് മറുപടി ലഭിക്കാതിരുന്നതിനെത്തുടര്‍ന്ന് കളക്ടറുടെ പരാതിയിൽ മന്ത്രിയ്ക്കെതിരെ പോലീസ് എഫ്ഐആര്‍ രജിസ്റ്റര്‍ ചെയ്യുകയായിരുന്നു. മതത്തിന്‍റെ പേരിൽ വോട്ട് പിടിക്കാൻ ശ്രമിച്ചെന്ന കുറ്റമാണ് ഇയാള്‍ക്കെതിരെ ചുമത്തിയിരിക്കുന്നത്.

മുസ്ലിങ്ങള്‍ക്ക് കൂട്ടത്തോടെ കോൺഗ്രസിന് വോട്ട് ചെയ്യാമെങ്കിൽ ഹിന്ദുക്കള്‍ സംഘടിച്ച് ബിജെപിയ്ക്ക് വോട്ട് ചെയ്ത് വൻഭൂരിപക്ഷത്തിൽ അധികാരത്തിൽ എത്തിക്കണമെന്നായിരുന്നു മന്ത്രിയുടെ ആഹ്വാനം. കോൺഗ്രസ് മുസ്ലിങ്ങളുടെ പാര്‍ട്ടിയാണെന്നും ബൻസ്വാരയിൽ നടന്ന തെരഞ്ഞെടുപ്പ് റാലിയിൽ മന്ത്രി ആഹ്വാനം ചെയ്തു. ഡിസംബര്‍ ഏഴിനാണ് രാജസ്ഥാനിൽ നിയമസഭാ തെരഞ്ഞെടുപ്പ്.

മതത്തിന്‍റെ പേരിൽ പ്രചരണത്തിന് ഇറങ്ങുന്നതിനെ ബിജെപി അനുകൂലിക്കുന്നില്ലെന്നും എല്ലാവര്‍ക്കുമൊപ്പം, എല്ലാവര്‍ക്കും വികസനം എന്നതാണ് ബിജെപിയുടെ മുദ്രാവാക്യമെന്നും കേന്ദ്രമന്ത്രി പ്രകാശ് ജാവദേക്കര്‍ പ്രതികരിച്ചു.