ഹൈദരബാദ്: പെട്രോള് പമ്പില് നിന്നും ലോറിയില് ഇന്ധനം നിറയ്ക്കുന്നതിനടെ ടയര് പൊട്ടിത്തെറിച്ച് വന് തീ പിടിത്തം. പ്രകാശം ജില്ലയിലെ സുരരെഡി പാലം ഗ്രാമത്തിലാണ് സംഭവമെന്ന് എഎൻഐയാണ് റിപ്പോർട്ട് ചെയ്തിരിക്കുന്നത്. ഉടൻ തീ അണച്ചതിനാൽ വൻ അപകടമാണ് ഒഴിവായത്. സംഭവത്തിൽ ആർക്കും പരിക്കേറ്റതായി റിപ്പോർട്ടുകളില്ല.
ഇന്നലെ രാത്രി ഏഴ് മണിയോടെയായിരുന്നു സംഭവം. തീപിടിത്തത്തിൽ ലോറി പൂർണ്ണമായും കത്തി നശിച്ചു. 'വൈകുന്നേരം 7 മണിയോടെ ഡീസൽ നിറയ്ക്കാനായി ഒരു ലോറി ബിപിസിഎൽ പെട്രോൾ പമ്പിലേക്കെത്തി. ഇന്ധനം നിറയ്ക്കുമ്പോൾ ലോറിയുടെ ടയർ പൊട്ടിത്തെറിച്ച് തീപിടിത്തമുണ്ടായി' തങ്കുതുരു ഫയർ ഓഫീസർ പിസി അങ്കയ്യ പറഞ്ഞു.
Also Read: കൊവിഡ് മുക്തനായിട്ടും കേന്ദ്ര ആഭ്യന്തര മന്ത്രി അമിത് ഷാ വീണ്ടും ആശുപത്രിയിൽ
ലോറിയ്ക്ക് തീപിടിച്ച ഉടൻ തന്നെ തങ്കുതുരു ഫയർ സ്റ്റേഷനിൽ നിന്നെത്തിയ ഫയർ എഞ്ചിനാണ് തീ അണച്ചത്. രണ്ട് മണിക്കൂറോളം പണിപ്പെട്ടാണ് തീ പൂർണ്ണമായും അണച്ചതെന്നാണ് റിപ്പോർട്ടുകൾ. അപകടത്തിൽ ആർക്കും പരിക്കേറ്റിട്ടില്ലെന്നും ഫയർ ഓഫീസർ വ്യക്തമാക്കി.