തെലങ്കാന മുഖ്യമന്ത്രി സഞ്ചരിക്കാനിരുന്ന ഹെലികോപ്റ്ററിൽ തീ

ഹൈദരാബാദ്: തെലങ്കാന മുഖ്യമന്ത്രി കെ ചന്ദ്രശേഖര്‍ റാവു ഹെലികോപ്റ്റര്‍ അപടകത്തിൽ നിന്ന് രക്ഷപെട്ടു. അദ്ദേഹം യാത്ര ചെയ്യാനായി കയറാനൊരുങ്ങിയ ഹെലികോപ്റ്ററിന്‍റെ വിഎച്ച്എസ് സംവിധാനത്തിൽ തീപിടിക്കുകയായിരുന്നു.

രാവിലെ പത്തര മണിയോടെ കരിംനഗറിൽ നിന്ന് ചന്ദ്രശേഖര്‍ റാവു ഹെലികോപ്റ്ററിൽ കയറാൻ തുടങ്ങവെ പുകയുയരുകയായിരുന്നു. ആശയവിനിമയസംവിധാനത്തിൽ ജീവനക്കാര്‍ തീ കണ്ടതോടെ യാത്ര താത്കാലികമായി മാറ്റി. തുടര്‍ന്ന് ഈ ഉപകരണങ്ങള്‍ മാറ്റി സ്ഥാപിച്ച ശേഷമാണ് ഹെലികോപ്റ്റര്‍ മുഖ്യമന്ത്രിയെയും കൊണ്ട് പറന്നത്.

അതേസമയം ഷോര്‍ട്ട്കര്‍ക്യൂട്ടാണ് പുക ഉയരാൻ കാരണമെന്നും ആശങ്കപ്പെടേണ്ട സാഹചര്യമില്ലെന്നും ഔദ്യോഗികവൃത്തങ്ങള്‍ അറിയിച്ചു.