ഫ്ളൈ ദുബായ് അപകടം: മരിച്ചവരില്‍ മലയാളി ദമ്പതികളും

റഷ്യയില്‍ തകര്‍ന്ന് വീണ ഫ്ളൈ ദുബായ് ബോയിംഗ് 737 വിമാനത്തില്‍ മൂന്ന് ഇന്ത്യക്കാ‍ര്‍ ഉണ്ടായിരുന്നതായി വിദേശകാര്യ മന്ത്രാലയം അറിയിച്ചു. ഇതിൽ മലയാളി ദമ്പതികളും ഒരു ചെന്നൈ സ്വദേശിയും ഉൾപ്പെട്ടിട്ടുണ്ട്. ​പെരുമ്പാവൂർ വെങ്ങോല ചാമക്കാലാ വീട്ടില്‍ ശ്യാംമോഹനും(27) ഭാര്യ അഞ്ജുവു(27)മാണ് മരിച്ചവരിൽ പെടുന്നത്. അവധിക്ക് നാട്ടില്‍ എത്തിയ ശേഷം കൊച്ചിയില്‍ നിന്ന് ദുബായ് വഴി വെള്ളിയാഴ്ചയാണ് ഇവര്‍ റഷ്യയിലേക്ക് പോയത്. റഷ്യയിൽ ആയുർവ്വേദ റിസോട്ടിൽ ജോലിചെയ്യുകയായിരുന്നു ഇവർ. ലാൻഡിംഗിനിടെ തീപിടിച്ച്‌ വിമാനം പൊട്ടിച്ചിതറുകയായിരുന്നു.

ദുബായ് ആസ്ഥാനമാക്കി പ്രവര്‍ത്തിയ്ക്കുന്ന എയര്‍ലൈന്‍ കമ്ബനിയാണ് ഫ്ളൈ ദുബായ്. ദുബായ് മീഡിയ ഓഫീസ് പുറത്ത് വിട്ട ട്വീറ്റിലും അപകടത്തില്‍പ്പെട്ട യാത്രക്കാരെപ്പറ്റി കൃത്യമായ വിവരങ്ങള്‍ നല്‍കുന്നുണ്ട്. 44 റഷ്യക്കാര്‍, എട്ട് ഉക്രൈന്‍ സ്വദേശികള്‍, രണ്ട് ഇന്ത്യക്കാര്‍, ഒരു ഉസ്ബക്കിസ്ഥാന്‍ സ്വദേശി എന്നിവരാണ് അപകടത്തില്‍ മരിച്ചത്.

വിമാനത്തിലുണ്ടായിരുന്ന ഏഴു ജീവനക്കാരും മരിച്ചു. യാത്രക്കാരും ജീവനക്കാരും ഉള്‍പ്പെടെ 62 പേരാണ് വിമാനത്തിലുണ്ടായിരുന്നത്. രണ്ട് സ്പെയിന്‍ സ്വദേശികള്‍, സൈപ്രസ്, കൊളംബിയ, സീഷെയ്ല്‍സ്, കിര്‍ഗിസ് റിപ്പബ്ലിക് എന്നീ രാജ്യക്കാരായ ഒാരോരുത്തര്‍ വീതം ജീവനക്കാരില്‍ ഉണ്ടായിരുന്നതായി യുഎഇയിലെ റഷ്യന്‍ സ്ഥാനപതി അലക്സാണ്ടര്‍ എഫിമോവ് പറഞ്ഞു.
അതേസമയം, തകര്‍ന്ന ബോയിങ് 737 വിമാനത്തിന്റെ ‍രണ്ട് ഡാറ്റാ റെക്കോര്‍ഡറുകളിലൊന്ന് കണ്ടെത്തിയതായി അധികൃതര്‍ അറിയിച്ചു. രണ്ടാമത്തേതിന് വേണ്ടിയുളള്ള തിരച്ചില്‍ തുടരുന്നു.രണ്ട് തവണ ലാന്‍ഡിംഗിന് ശ്രമിയ്ക്കുന്നതിനിടെ ചിറകിന് തീപിടിയ്ക്കുകയും പൊട്ടിച്ചിതറുകയുമായിരുന്നു വിമാനം. മോശം കാലാവസ്ഥയാണ് വിമാനത്തിന്റെ ലാന്‍ഡിംഗിന് തടസമായതെന്നാണ് വിവരം.