തിരിച്ചടിയായി കൊവിഡ്; അയോധ്യ ഭൂമിപൂജയിൽ നിന്ന് വിട്ടുനിൽക്കാൻ ഉമാഭാരതിയും

ന്യൂഡൽഹി: കൊവിഡ് പശ്ചാത്തലത്തിൽ അയോധ്യ ഭൂമിപൂജയിൽ പങ്കെടുക്കില്ലെന്ന് ബിജെപി നേതാവ് ഉമാഭാരതി. താൻ അയോധ്യയിൽ ഉണ്ടാകുമുമെന്നും ചടങ്ങിനും ശേഷം ക്ഷേത്രത്തിലെത്തി ദര്‍ശനം നടത്തുമെന്നും ഉമാഭാരതി വ്യക്തമാക്കി. ഓഗസ്റ്റ് അഞ്ചിനാണ് അയോധ്യയിൽ പുതിയ ക്ഷേത്രത്തിൻ്റെ ശിലാസ്ഥാപനം നടക്കുന്നത്.

പ്രധാനമന്ത്രി നരേന്ദ്ര മോദിയടക്കമുള്ള ഉന്നത ബിജെപി നേതാക്കള്‍ക്ക് പരിപാടിയിലേയ്ക്ക് ക്ഷണമുണ്ട്. കേന്ദ്ര ആഭ്യന്തരമന്ത്രി അമിത് ഷായ്ക്ക് കൊവിഡ് സ്ഥിരീകരിച്ച് ഒരു ദിവസത്തിനു ശേഷമാണ് ചടങ്ങിൽ നിന്ന് പിന്മാറുന്നതായി ഉമാഭാരതി അറിയിച്ചത്. അതിഥികളുടെ പട്ടികയിൽ നിന്നു തൻ്റെ പേര് ഒഴിവാക്കാനും ഉമാഭാരതി ക്ഷേത്ര ട്രസ്റ്റിനോട് അപേക്ഷിച്ചു. അമിത് ഷായ്ക്ക് കൊവിഡ് സ്ഥിരീകരിച്ച പശ്ചാത്തലത്തിൽ പ്രധാനമന്ത്രി നരേന്ദ്ര മോദി അടക്കമുള്ള നേതാക്കളുടെ ആരോഗ്യത്തിൽ ഉമാഭാരതി ആശങ്കയറിയിച്ചു. ഈ സാഹചര്യത്തിൽ ശിലാസ്ഥാപനച്ചടങ്ങ് നടക്കുന്ന സമയത്ത് താൻ സരയൂനദിയുടെ തീരത്തായിരിക്കുമെന്ന് ഉമാഭാരതി ട്വീറ്റിൽ കുറിച്ചു.

Also Read: 1.82 കോടി കടന്ന് കൊവിഡ് ബാധിതര്‍; മരണം 7 ലക്ഷത്തിലേക്ക്; കൂടുതല്‍ രാജ്യങ്ങള്‍ കടുത്ത നിയന്ത്രണത്തില്‍

ഭോപ്പാലിൽ നിന്ന് അയോധ്യയിലേയ്ക്കുള്ല യാത്രയ്ക്കിടയിൽ കൊവിഡ് ബാധിതനായ ഒരാളുമായി താൻ സമ്പര്‍ക്കത്തിൽ വന്നിരിക്കാൻ സാധ്യതയുണ്ടെന്നും ചടങ്ങിൽ പങ്കെടുക്കാതിരിക്കാൻ ഇതും ഒരു കാരണമാണെന്നും ഉമാഭാരതി അറിയിച്ചിട്ടുണ്ട്. ചടങ്ങിൽ പങ്കെടുക്കില്ലെന്ന വിവരം ഉമാഭാരതി പ്രധാനമന്ത്രിയുടെ ഓഫീസിനെയും അറിയിച്ചിട്ടുണ്ട്.

Also Read: ദാസനെയും വിജയനെയും ഞെട്ടിച്ച ആ കറവക്കാരന് സഹായം വേണം; കടം പെരുകി... മരുന്ന് വാങ്ങാന്‍ പണമില്ല... നിസഹായാവസ്ഥ തുറന്നുപറഞ്ഞ് രാജന്‍ പാടൂര്‍!

ഓഗസ്റ്റ് അഞ്ചിന് നടക്കുന്ന ഭൂമി പൂജ ചടങ്ങിലേയ്ക്ക് പ്രധാനമന്ത്രി നരേന്ദ്ര മോദിയ്ക്കു പുറമെ മുതിര്‍ന്ന ബിജെപി നേതാക്കളായ എൽ കെ അദ്വാനി, മുരളി മനോഹര്‍ ജോഷി എന്നിവരെയും പരിപാടിയിലേയ്ക്ക് ക്ഷണിച്ചിട്ടുണ്ട്. മോഹൻ ഭഗവത് ഉള്‍പ്പെടെയുള്ള ആര്‍എസ്എസ് നേതാക്കളും പരിപാടിയിൽ പങ്കെടുക്കുമെന്നാണ് റിപ്പോര്‍ട്ടുകള്‍.