പ്രതിഷേധ സാധ്യത; ഇന്ത്യന്‍ സയന്‍സ് കോണ്‍ഗ്രസ് സമ്മേളനം മാറ്റിവച്ചു

ന്യൂഡല്‍ഹി: നൂറ് വര്‍ഷത്തെ ചരിത്രത്തില്‍ ആദ്യമായി ഇന്ത്യന്‍ സയന്‍സ് കോണ്‍ഗ്രസിന്റെ 105-ാം സമ്മേളനം മാറ്റിവെച്ചു. പ്രധാനമന്ത്രി നരേന്ദ്ര മോദി പങ്കെടുക്കേണ്ടിയിരുന്ന സമ്മേളനം ഹൈദരാബാദിലെ ഒസ്മാനിയ സര്‍വകലാശാലയിലായില്‍ ജനവരി മൂന്ന് മൂതല്‍ ഏഴ് വരെയുള്ള ദിവസങ്ങളിലാണ് നിശ്ചയിച്ചിരുന്നത്.

ഇവിടെ വിദ്യാര്‍ഥികളുടെ പ്രതിഷേധം ഉണ്ടാകുമെന്ന് കണ്ടാണ് പരിപാടി മാറ്റിവെക്കാന്‍ തീരുമാനിച്ചത്.
ദളിത്, പിന്നാക്ക വിഷയത്തില്‍ പ്രധാനമന്ത്രിക്കെതിരേയും സര്‍ക്കാര്‍ റിക്രൂട്ട്‌മെന്റുമായി ബന്ധപ്പെട്ട് തെലുങ്കാന മുഖ്യമന്ത്രി ചന്ദ്രശേഖര്‍ റാവുവിനെതിരേയും വിദ്യാര്‍ഥികളില്‍ നിന്ന് പ്രതിഷേധം ഉണ്ടാകാന്‍ സാധ്യതയുള്ളതായി സുരക്ഷാ ഉദ്യോഗസ്ഥര്‍ക്ക് വിവരം ലഭിച്ചിരുന്നു.

ഡിസംബര്‍ ആദ്യവാരം സര്‍വകലാശാലയിലെ എം എസ്സി വിദ്യാര്‍ഥി ഇവിടെ ആത്മഹത്യ ചെയ്തിരുന്നു. ഇതില്‍ വിദ്യാര്‍ഥികള്‍ പ്രതിഷേധത്തിലുമായിരുന്നു. തുടര്‍ന്നാണ് സര്‍വകലാശാല അധികൃതര്‍ പരിപാടി നിശ്ചയിച്ച സമയത്ത് നടത്താന്‍ കഴിയില്ലെന്ന് അറിയിച്ചത്. പുതിയ തീയ്യതി തീരുമാനിച്ചിട്ടില്ല.