ശബരിമലയിലേത് മതഭ്രാന്തെന്ന് മുന്‍ അറ്റോര്‍ണി ജനറല്‍

ന്യൂഡല്‍ഹി: ശബരിമല സ്ത്രീപ്രവേശനവുമായി ബന്ധപ്പെട്ട് ഇപ്പോള്‍ കേരളത്തില്‍ അരങ്ങേറുന്നത് മതഭ്രാന്തെന്ന് മുന്‍ അറ്റോര്‍ണി ജനറലും ഭരണഘടനാ വിദഗ്ധനുമായ സോളി സൊറാബ്ജി. സുപ്രീം കോടതി വിധി നടപ്പാക്കുകയാണ് വേണ്ടത്. അത് സര്‍ക്കാരിന്‍റെ ഉത്തരവാദിത്തമാണ്. വിധി നടപ്പാക്കിയില്ലെങ്കില്‍ അത് സര്‍ക്കാരിന്‍റെ വീഴ്ചയാകുമെന്നും സോളി സൊറാബ്ജി വ്യക്തമാക്കി.

ശബരിമലയിലെ പ്രതിഷേധങ്ങള്‍ അന്താരാഷ്ട്ര തലത്തില്‍ ഇന്ത്യയ്ക്ക് ചീത്തപ്പേരുണ്ടാക്കും. ബിജെപിയും കോണ്‍ഗ്രസും ശബരിമല വിഷയത്തെ രാഷ്ട്രീയ മുതലെടുപ്പിനായി ഉപയോഗിക്കുകയാണെന്നും അദ്ദേഹം വിമര്‍ശിച്ചു. സുപ്രീം കോടതി വിധിക്കെതിരെ നിയമമോ ഓര്‍ഡിനന്‍സോ ഇറക്കിയാല്‍ അത് ഭരണഘടനാ പരമായി നിലനില്‍ക്കില്ലെന്നും സോളി സൊറാബ്ജി കൂട്ടിച്ചേര്‍ത്തു.