എല്ലാവർക്കും ഫ്രീയായി വാക്സിൻ തരുമെന്ന് ബിജെപി; കൊവിഡ് കാലത്ത് വാഗ്ദാനങ്ങൾ ഇങ്ങനെ

പട്ന: കൊവിഡ് 19 കാലത്ത് ശക്തമായ ഏറ്റുമുട്ടൽ നടക്കുന്ന ബിഹാര്‍ തെര‍ഞ്ഞെടുപ്പിൽ വോട്ടര്‍മാര്‍ക്ക് വൻ വാഗ്ദാനങ്ങളുമായി ബിജെപി പ്രകടന പത്രിക. കേന്ദ്ര ധനമന്ത്രി നിര്‍മലാ സീതാരാമനും മുതിര്‍ന്ന ബിജെപി നേതാക്കളായ ഭൂപേനദര്‍ യാദവ്, നിത്യാനന്ദ് റായ്, അശ്വിൻ ചൗബേ, പ്രമോദ് കുമാര്‍ എന്നിവരും ചേര്‍ന്നാണ് പട്നയിൽ വെച്ച് പ്രകടന പത്രിക പുറത്തിറക്കിയത്.

എല്ലാവര്‍ക്കും സൗജന്യമായി കൊവിഡ് 19 വാക്സിൻ നല്‍കുമെന്നും 19 ലക്ഷം യുവാക്കള്‍ക്ക് തൊഴിലവസരങ്ങള്‍ സൃഷ്ടിക്കുമെന്നുമാണ് ബിജെപിയുടെ വാഗ്ദാനം. പ്രധാനമന്ത്രിയുടെ 'സ്വയംപര്യാപ്ത ഭാരതം' പദ്ധതിയിലൂന്നിയതാണ് പ്രകടനപത്രികയെന്നാണ് ദേശീയ മാധ്യമങ്ങളുടെ റിപ്പോര്‍ട്ട്. സ്വയം പര്യാപ്ത ബിഹാര്‍ എന്നാണ് പ്രകടനപത്രികയിലെ വിശേഷണം.

രാജ്യത്ത് കൊവിഡ് 19 വാക്സിൻ ഇപ്പോള്‍ പരീക്ഷണഘട്ടത്തിലാണെന്നും ഇത് വ്യാവസായികാടിസ്ഥാനത്തിൽ ഉത്പാദിപ്പിച്ചു തുടങ്ങുന്നതോടെ ബിഹാറിലെ എല്ലാവര്‍ക്കും സൗജന്യമായി വിതരണം ചെയ്യുമെന്ന് നിര്‍മലാ സീതാരാമൻ വ്യക്തമാക്കി. പ്രകടനപത്രികയിലെ ഏറ്റവുമാദ്യത്തെ വാഗ്ദാനം ഇതാണെന്നും നിര്‍മലാ സീതാരാമൻ വ്യക്തമാക്കി.

Also Read: കുമ്മനത്തിനെതിരെ സാമ്പത്തിക തട്ടിപ്പ് കേസ്; 28.75 ലക്ഷം രൂപ തട്ടിച്ചെന്ന് പരാതി

അഞ്ച് വര്‍ഷത്തിനിടെ 19 ലക്ഷം പുതിയ തൊഴിലവസരങ്ങള്‍, ദര്‍ഭംഗയിൽ പുതിയ എഐഐഎംഎസ്, മൂന്ന് ലക്ഷം പുതിയ അധ്യാപകരെ നിയമിക്കും, 2022ഓടു കൂടി 30 ലക്ഷം പാവപ്പെട്ടവര്‍ക്ക് വീട്, രണ്ട് വര്‍ഷത്തിനുള്ളിൽ പുതിയ പാൽ സംസ്കരണകേന്ദ്രങ്ങള്‍, അരിയ്ക്കും ഗോതമ്പിനും പുറമെ പയര്‍ വര്‍ഗങ്ങള്‍ക്കും മിനിമം താങ്ങുവില, ആരോഗ്യമേഖലയിൽ ഒരു ലക്ഷം തൊഴിൽ എന്നിവയാണ് പ്രകടനപത്രികയിലെ വാഗ്ദാനങ്ങള്‍.

Also Read: ഇന്ത്യയുടെ നാഗ് ആന്റി ടാങ്ക് മിസൈലിന്റെ പരീക്ഷണം വിജയകരം

എൻഡിഎ ഭരണത്തിനു കീഴിൽ സംസ്ഥാനത്തെ മൊത്തം ആഭ്യന്തര വളര്‍ച്ച വൻതോതിൽ ഉയര്‍ന്നതായി നിര്‍മലാ സീതാരാമൻ വ്യക്തമാക്കി. മുന്നണി വിജയിച്ചാൽ നിതീഷ് കുമാര്‍ തന്നെയായിരിക്കും അടുത്ത അഞ്ച് വര്‍ഷവും മുഖ്യമന്ത്രിയെന്നും നിര്‍മലാ സീതാരാമൻ വ്യക്തമാക്കിയതായി എഎൻഐ റിപ്പോര്‍ട്ട് ചെയ്തു. നിതീഷ് കുമാറിനു കീഴിൽ ബിഹാര്‍ രാജ്യത്തെ വികസിത സംസ്ഥാനമായി മാറുമെന്നും നിര്‍മലാ സീതാരാമൻ വ്യക്തമാക്കി.