ഇത് വായിക്കുമ്പോള്‍ മനസിലാകും, ഒരു ഗ്ലാസ് വെള്ളംപോലും പാഴാക്കരുത്

ഹോട്ടലുകളില്‍ നിങ്ങള്‍ ഭക്ഷണത്തിന് ശേഷം കുടിക്കാതെ ഉപേക്ഷിക്കുന്ന ഒരു ഗ്ലാസ് വെള്ളമില്ലേ, അത് മൊത്തം കൂടിച്ചേര്‍ന്നാല്‍ എത്രയുണ്ടാകുമെന്ന് ഊഹിക്കാമോ?

ബെംഗലൂരു നഗരത്തില്‍ താമസിക്കുന്ന ഗര്‍വിത ഗുലാത്തി എന്ന സംരംഭക ഇതൊന്ന് കണക്കുകൂട്ടി. ഒരു വര്‍ഷം 14 ദശലക്ഷം ലിറ്റര്‍ വെള്ളമാണ് ഹോട്ടലുകളില്‍ അതിഥികള്‍ ബാക്കിവച്ചിട്ടു പോകുന്നതെന്നാണ് അവരുടെ കണക്ക്.

'എന്തിന് പാഴാക്കണം' എന്ന പേരില്‍ അവര്‍ ഒരു സന്നദ്ധ സംഘടന ആരംഭിച്ചിട്ടുണ്ട്. ഈ സംഘടന ആളുകളെ പഠിപ്പിക്കുന്നത് ഇതേ വിഷയമാണ്. ഓണ്‍ലൈന്‍ ആയി ഈ വെള്ളം പാഴാക്കലിന് എതിരെ അവര്‍ ഒരു നിവേദനം ആരംഭിച്ചു.

ഗര്‍വിതയുടെ ആവശ്യങ്ങള്‍ രണ്ടാണ്,

1. ഹോട്ടലുകളില്‍ ചെറിയ ഗ്ലാസുകള്‍ മാത്രം ഉപയോഗിക്കുക.
2. പകുതി ഗ്ലാസ് വെള്ളം മാത്രം അതിഥികള്‍ക്ക് ആദ്യം ഒഴിച്ചുനല്‍കാന്‍ വെയിറ്റര്‍മാര്‍ക്ക് നിര്‍ദേശം നല്‍കുക.

ദേശീയ റസ്റ്ററന്‍സ്‍ അതോറിറ്റി ഓഫ് ഇന്ത്യ (എന്‍ആര്‍എഐ) തന്‍റെ പരാതി കേള്‍ക്കുമെന്നാണ് ഗര്‍വിതയുടെ പ്രതീക്ഷ. 9000 പേരുടെ ഒപ്പുകള്‍ ഗര്‍വിത ശേഖരിച്ചു. മൊത്തം 10,000 ഒപ്പുകളാണ് അവര്‍ക്കാവശ്യം.