മോഷണക്കുറ്റം ചുമത്തി: പെൺകുട്ടി ആത്മഹത്യ ചെയ്തു

ത്രിപുര: മോഷണക്കുറ്റം ചുമത്തി ഷോപ്പിങ് മാളിൽ തടഞ്ഞു നിർത്തിയതിൽ മനം നൊന്ത് ആദിവാസി പെൺകുട്ടി ആത്മഹത്യ ചെയ്തു. പശ്ചിമ ത്രിപുരയിലെ ബർക്കത്തലിലാണ് സംഭവം.

ഓക്‌സിലിയം ഗേൾസ് ഹയർസെക്കന്‍ഡറി സ്‌കൂളിലെ വിദ്യാർത്ഥിനിയാണ് സുഹൃത്തുക്കൾക്കൊപ്പം ഷോപ്പിങ് മാളിൽ പോയപ്പോൾ സെക്യൂരിറ്റി ജീവനക്കാരൻ തടഞ്ഞു വെച്ചത്. പെൺകുട്ടിയോടൊപ്പം മൂന്ന് സുഹൃത്തുക്കളും ഉണ്ടായിരുന്നു.പെൺകുട്ടി സാധനങ്ങൾ മോഷ്ടിച്ചുവെന്ന് ആരോപിച്ച് സെക്യൂരിറ്റി ജീവനക്കാരൻ തടഞ്ഞു വെച്ച് അപമാനിച്ചതിനെ തുടർന്ന് 4000 രൂപയുമായി എത്തി തന്നെ മോചിപ്പിക്കണമെന്ന് പെൺകുട്ടി മാതാപിതാക്കളെ ഫോണിൽ വിളിച്ച് ആവശ്യപ്പെട്ടു. ഇതേ തുടർന്ന്, പെൺകുട്ടിയെ സ്‌കൂളിൽ നിന്ന് പുറത്താക്കുകയും ചെയ്തു. ഷോപ്പിങ് മാളിലെ ദുരനുഭവത്തിലും സ്‌കൂൾ അധികൃതരുടെ നടപടിയിലും മനം നൊന്തതിനെ തുടർന്നാണ് പെൺകുട്ടി ആത്മഹത്യ ചെയ്തതെന്നാണ് നിഗമനം. പെൺകുട്ടിയെ വീട്ടിലെ കിടപ്പു മുറിയിൽ തൂങ്ങി മരിച്ച നിലയിലാണ് കണ്ടെത്തിയത്.