പിതാവില്‍ നിന്നുള്ള ബലാത്സംഗം തടഞ്ഞില്ല; പെൺകുട്ടിയ്ക്ക് ചാട്ടവാറിനടി

മുംബൈ: സ്വന്തം പിതാവിന്‍റെ ലൈംഗീക പീഡനത്തില്‍ ഗർഭിണിയായ പെൺകുട്ടിയ്ക്ക് പീഡനം തടഞ്ഞില്ല എന്ന കുറ്റത്തില്‍ ചാട്ടവാറിനടി. മഹാരാഷ്ട്ര സത്താറ ജില്ലയിലെ പച്‌വാഡ് പഞ്ചായത്ത് അധികൃതരാണ് പ്രാകൃതമായ ഈ വിധി നടപ്പിലാക്കിയത്.

കഴിഞ്ഞ നാല് മാസത്തിലധികമായി പിതാവ് പതിമൂന്നുകാരിയായ പെണ്‍കുട്ടിയെ ലൈംഗികമായി ഉപയോഗിക്കുകയായിരുന്നു. പെണ്‍കുട്ടി ഗര്‍ഭിണിയായതോടെയാണ് സംഭവം ഗ്രാമവാസികളറിയുന്നത്. പെണ്‍കുട്ടിയുടെ അമ്മ നേരത്തേ മരിച്ചു പോയിരുന്നു. പിതാവിനും ഇതേ ശിക്ഷ തന്നെയാണ് വിധിച്ചിരിക്കുന്നത്.

സ്വന്തം മകളെ പീഡിപ്പിച്ച കുറ്റത്തിന് പിതാവിനും പിതാവിന്‍റെ അതിക്രമങ്ങളെ ചെറുക്കാതിരുന്ന പെണ്‍കുട്ടിയ്ക്കും ചാട്ടവാറടി വീതമാണ് ശിക്ഷ വിധിച്ചത്. പിതാവിന് 25 ചാട്ടവാറടി ലഭിച്ചപ്പോള്ർ "ശുദ്ധീകരണത്തി"നായാണ് പെൺകുട്ടിയേയും മർദ്ദിച്ചത്. പെണ്‍കുട്ടിയെ ചാട്ടവാറിനടിക്കുന്ന ദൃശ്യങ്ങളുമായി വിവരാവകാശ പ്രവര്‍ത്തകന്‍ സച്ചിന്‍ ബിഷേ പൊലീസിനെ സമീപിച്ചതോടെയാണ് സംഭവം പുറംലോകമറിയുന്നത്.

തെളിവുകള്‍ പരിശോധിച്ച പൊലീസ് പഞ്ചായത്ത് അധികൃതരെയും പെണ്‍കുട്ടിയുടെ പിതാവിനേയും അറസ്റ്റ് ചെയ്തു. പെണ്‍കുട്ടിയെ പൊലീസ് അടുത്തുള്ള ആശുപത്രിയില്‍ പ്രവേശിപ്പിച്ചിരിക്കുകയാണ്.