'ഇത് പെരിയാറുടെ നാട്, അമിത് ഷാ ഗോ ബാക്ക്'; തമിഴ്‍നാട് പിടിക്കാന്‍ അമിത് ഷാ വരുമ്പോള്‍ കേൾക്കുന്നത്

തമിഴ്നാട്ടിൽ 2021-ൽ നടക്കാനിരിക്കുന്ന നിയമസഭാ തെരഞ്ഞെടുപ്പ് ലാക്കാക്കിയാണ് അമത് ഷായുടെ വരവ്. വിവിധ പാർട്ടി പ്രതിനിധികളുമായി കൂടിക്കാഴ്ച നടത്താനും സർക്കാർ പരിപാടികളിൽ പങ്കെടുക്കുന്നതിനുമാണ് അമിത് ഷാ ശനിയാഴ്ച ചെന്നൈയിൽ എത്തിയത്. എന്നാൽ "ബിജെപി തമിഴ്നാട്ടിലും കേരളത്തിലും വിജയം നേടില്ല. കാരണം ആർഎസ്എസിന്റെ ആശയങ്ങളെ ആളുകൾ അത്രമാത്രം വെറുക്കുന്നുണ്ട്. ഉത്തരേന്ത്യയിലെ ആളുകൾ ആർഎസ്എസിന്റെ ആശയങ്ങളെ സാമാന്യവത്കരിച്ചിട്ടുണ്ട്. അതിനാലാണ് അവർ ഇപ്പോൾ അധികാരത്തിൽ തുടരുന്നത്." ആസിഫ് ഖാൻ എന്നയാൾ ട്വീറ്റ് ചെയ്തു. #ഗോബാക്ക്അമിത്ഷാ എന്ന ഹാഷ്ടാഗോടുകൂടിയാണ് പോസ്റ്റ്.

"രാജ്യത്തെ ഭിന്നിപ്പിച്ചതിൽ അവർ എപ്പോഴും പഴി കേൾക്കുന്നുണ്ട്. എന്നാൽ എപ്പോഴൊക്കെ അവർ തമിഴ്നാട്ടിൽ വന്നിട്ടുണ്ടോ അപ്പോഴൊക്കെ സംസ്ഥാനത്തെയാകെ അവർക്കെതിരെതന്നെ അവർ ഒന്നിപ്പിക്കുന്നുണ്ട്. #ഗോബാക്ക്അമിത്ഷാ പെരിയാറിന്റെ മണ്ണിലേക്ക് നിങ്ങൾക്ക് പ്രവേശനമില്ല." എന്നാണ് മറ്റൊരു ട്വിറ്റർ ഹാന്റിലിൽ നിന്നും വന്നിരിക്കുന്ന പോസ്റ്റ്. "തമിഴ്നാടിന് നിങ്ങളെ ആവശ്യമില്ല." എന്നാണ് സവിത എന്ന സ്ത്രീ ട്വീറ്റ് ചെയ്തിരിക്കുന്നത്.

ഒരു വർഷത്തെ ഇടവേളയ്ക്ക് ശേഷമാണ് അമിത് ഷാ തമിഴ്നാട് സന്ദർശിക്കാനെത്തുന്നത്. അന്തരിച്ച മുതിർന്ന എഐഎഡിഎംകെ നേതാക്കളായ എംജി രാമചന്ദ്രൻ (എംജിആർ), ജെ ജയലളിത എന്നിവരുടെ സ്മൃതി മണ്ഡപത്തിൽ വൈകിട്ട് 4.30 ന് പുഷ്പാർച്ചന നടത്തിയ ശേഷമായിരിക്കും അമിത് ഷായുടെ തമിഴ്നാട് സന്ദർശനം ഔദ്യോഗികമായി ആരംഭിക്കുക. തുടർന്ന് ചെന്നൈ മെട്രോ റെയിൽ പദ്ധതി അടക്കമുള്ള സർക്കാർ പദ്ധതികളുടെ ശിലാസ്ഥാപനം നടത്തും. ചടങ്ങിൻ മുഖ്യമന്ത്രി എടപ്പാടി പളനിസ്വാമി, ഉപമുഖ്യമന്ത്രി ഒ പനീർശെൽവം എന്നിവർ പങ്കെടുക്കും. തുടർന്ന് വരാനിരിക്കുന്ന നിയമസഭാ തെരഞ്ഞെടുപ്പുമായി ബന്ധപ്പെട്ട് ബിജെപി സംസ്ഥാന ഭാരവാഹികളുമായി അമിത് ഷാ ചർച്ച നടത്തും.

2019-ൽ മധുരയിൽ എയിംസിന്റെ ശിലാസ്ഥാപനം നടത്താനെത്തിയ പ്രധാനമന്ത്രി നരേന്ദ്ര മോദി കടുത്ത പ്രതിഷേധമാണ് തമിഴ്നാട്ടിൽ നേരിടേണ്ടിവന്നത്. അന്ന് #ഗോബാക്ക്മോദി #ഗോബാക്ക്സാഡിസ്റ്റ്മോദി എന്നിങ്ങനെയുള്ള ഹാഷ്ടാഗുകളോടുകൂടിയായിരുന്നു അന്നത്തെ പ്രതിഷേേധം. മോദി തട്ടിപ്പുകാരനാണെന്ന് പറയുന്ന ഒരു ഗാനം പ്രാദേശിക ബാൻഡ് ഒരുക്കുകയും ചെയ്തു. എന്നാൽ അവരെ പോലീസ് വിലക്കി. 2018 ഉണ്ടായ ഗജ ചുഴലിക്കാറ്റിൽ മൂന്ന് ലക്ഷത്തോളം ആളുകൾക്ക് വീട് നഷ്ടമായപ്പോൾ തമിഴ്നാട് സന്ദർശിക്കാൻ മോദി വിസമ്മതിച്ചതാണ് അന്ന് തമിഴ്നാടിനെ പ്രകോപിപ്പിച്ചത്.