PNB തട്ടിപ്പ് : മോദിയെ സഹായിച്ച ബാങ്കുദ്യോഗസ്ഥൻ അറസ്റ്റിൽ

മുംബൈ: വജ്രവ്യാപാരി നീരവ് മോദി 11,400 കോടിയുടെ തട്ടിപ്പുനടത്തിയ കേസില്‍ ബാങ്കിലെ മുന്‍ ഉദ്യോഗസ്ഥര്‍ ഉള്‍പ്പെടെ മൂന്നുപേര്‍ അറസ്റ്റില്‍. പഞ്ചാബ് നാഷണല്‍ ബാങ്കിനെ കബളിപ്പിച്ചാണ് കഴിഞ്ഞ 7 വർഷമായി നീരവ് മോദി തട്ടിപ്പ് നടത്തിയിരുന്നത്. ബാങ്കിലെ മുന്‍ ഡെപ്യൂട്ടി മാനേജര്‍ ഗോകുല്‍നാഥ് ഷെട്ടി, ഏകജാലക ഓപ്പറേറ്റര്‍ മനോജ് ഖാരാട്ട്, നീരവ് മോദിയുടെ ഉദ്യോഗസ്ഥന്‍ ഹേമന്ത് ഭട്ട് എന്നിവരാണ് അറസ്റ്റിലായത്. നീരവ് മോദിക്ക് രേഖകളില്ലാതെ ബയേഴ്സ് ക്രെഡിറ്റ് നല്‍കിയ സംഘത്തിലെ മുഖ്യകണ്ണിയാണ് അറസ്റ്റിലായ ഗോകുല്‍ നാഥ് ഷെട്ടി. കേസുമായി ബന്ധപ്പെട്ട ആദ്യത്തെ അറസ്റ്റാണിത്.

ഇവര്‍ ഒളിവിലാണ്, ഇവര്‍ക്കുവേണ്ടി തിരച്ചില്‍ നടത്തുകയാണെന്നാണ് സി.ബി.ഐ. കഴിഞ്ഞദിവസം പറഞ്ഞിരുന്നത്. എന്നാല്‍ രണ്ടാഴ്ചയോളമായി ഇവര്‍ സി.ബി.ഐ. കസ്റ്റഡിയിലായിരുന്നുവെന്നാണ് വിവരം. വിശദമായ ചോദ്യംചെയ്യലിനുശേഷം ശനിയാഴ്ചയാണ് അറസ്റ്റ് രേഖപ്പെടുത്തിയത്. ഇതില്‍ ഗോകുല്‍നാഥ് ഷെട്ടിയാണ് മാനദണ്ഡങ്ങള്‍ മറികടന്ന് നീരവ് മോദിക്ക് ബയേഴ്സ് ക്രെഡിറ്റ് നല്‍കാന്‍ കൂട്ടുനിന്നതെന്നാണ് സി.ബി.ഐ.യുടെ കണ്ടെത്തല്‍. ഇതിനായി വന്‍തുക ഇയാള്‍ വാങ്ങിയിരുന്നെന്നും വ്യക്തമായിട്ടുണ്ട്. ഗോകുല്‍ നാഥ് ഷെട്ടിയുടെ വീട്ടില്‍ ആദായനികുതി വകുപ്പും എന്‍ഫോഴ്സ്മെന്റ് വകുപ്പും സംയുക്തമായി അന്വേഷണം നടത്തിയിരുന്നു. പരിശോധനയില്‍ കണക്കില്‍പ്പെടാത്ത സ്വത്തുവകകള്‍ കണ്ടെത്തിയിരുന്നു. ഇതെല്ലാം നീരവ് മോദിക്ക് അനധികൃതമായി സഹായം ചെയ്ത് നേടിയവയാണെന്നാണ് സംശയം.

അതേസമയം, ഗോകുല്‍ നാഥ് ഷെട്ടി പറഞ്ഞ കാര്യങ്ങള്‍ അനുസരിക്കുക മാത്രമാണ് അറസ്റ്റിലായ മനോജ് ഖാരാട്ട് ചെയ്തത്. ഇയാള്‍ക്ക് നീരവ് മോദിയുമായി നേരിട്ട് ബന്ധമുണ്ടായിരുന്നില്ലെന്നാണ് സി.ബി.ഐ. അന്വേഷണസംഘം പറയുന്നത്. അറസ്റ്റിലായ മൂന്നാമന്‍ നീരവ് മോദിയുടെ സഹായിയാണ്. ഇയാളാണ് ബയേഴ്സ് ക്രെഡിറ്റ് ലഭ്യമാക്കാന്‍ ബാങ്ക് ജീവനക്കാരുമായി ബന്ധപ്പെട്ടതെന്ന് അന്വേഷണസംഘം പറയുന്നത്.