കൊൽക്കത്ത: ബിജെപിയുമായി ഇടഞ്ഞ് തെലുങ്കുദേശം പാര്ട്ടി എൻഡിഎ വിട്ടതിനു പിന്നാലെ ഗൂര്ഖ ജനശക്തി മോര്ച്ചയും മുന്നണി വിട്ടു. ബിജെപി വിശ്വാസവഞ്ചന കാണിച്ചെന്നാരോപിച്ചാണ് മുന്നണി വിടുന്നതെന്ന് ജി.ജെ.എം അധ്യക്ഷൻ എൽഎം ലാമ അറിയിച്ചു.
ബിജെപി പശ്ചിമബംഗാള് പ്രസിഡന്ര് ദിലീപ് ഘോഷിന്റെ പ്രസ്താവനയിൽ തങ്ങള് നിരാശരാണെന്നും ബിജെപിയുടെ നേതൃത്വത്തിലുള്ള എൻഡിഎയുമായി പാര്ട്ടിയ്ക്ക് ഒരു ബന്ധവും ഉണ്ടാവില്ലെന്നും അദ്ദേഹം പറഞ്ഞു. തെരഞ്ഞെടുപ്പുകളിൽ ഇനി പാര്ട്ടി ഒറ്റയ്ക്ക് മത്സരിക്കും. ഗൂര്ഖകളോട് ബിജെപിയ്ക്ക് യാതൊരു അനുകമ്പയുമില്ല. തെരഞ്ഞെടുപ്പ് വിജയത്തിനുള്ള സഹായം മാത്രമാണ് അവര്ക്ക് വേണ്ടത്. 2009ലും 2014ലും ബിജെപിയ്ക്ക് ലഭിച്ച വിജയം തങ്ങളുടെ സംഭാവനയാണെന്നും അദ്ദേഹം ഓര്മിപ്പിച്ചു.
മൂന്ന് എംഎൽഎമാരുള്ള ഗൂര്ഖ ജനശക്തി മോര്ച്ച പശ്ചിമബംഗാളിൽ ബിജെപിയുടെ പ്രധാന സഖ്യകക്ഷിയാണ്. ഗൂര്ഖലാൻഡ് എന്ന പേരിൽ പ്രത്യേകസംസ്ഥാനം അനുവദിക്കണമെന്നാവശ്യപ്പെട്ട് ഇവര് ബംഗാളിൽ നീണ്ട പ്രക്ഷോഭം നടത്തിയിരുന്നു.