ന്യൂഡല്‍ഹി: സിബിഐ താല്‍കാലിക ഡയറക്ടറായി എം നാഗേശ്വര റാവു ചുമതലയേറ്റു. സിബിഐ ഡയറക്ടര്‍ സ്ഥാനത്തുനിന്നും അലോക് വര്‍മ്മയെ പ്രധാനമന്ത്രിയുടെ നേതൃത്വത്തിലുള്ള സെലക്ഷന്‍ കമ്മിറ്റി മാറ്റിയതിനെ തുടര്‍ന്നാണ് റാവു ചുമതലയേറ്റിയിരിക്കുന്നത്. 1986 ബാച്ച് ഒഡീഷ കേഡറിലെ ഐപിഎസ് ഓഫീസറാണ് നാഗേശ്വര റാവു.
അതേസമയം അലോക് വര്‍മ്മയെ മാറ്റാനുള്ള തീരുമാനം വന്ന് രണ്ട് മണിക്കൂറിനുള്ളില്‍ തന്നെ നാഗേശ്വര റാവുവിലെ നിയമിച്ചുവെവന്നാണ് പുറത്തുവരുന്ന വിവരം.
അലോക് വര്‍മയെ സിബിഐ ഡയറക്ടര്‍ സ്ഥാനത്ത് നിന്നു മാറ്റിയ കേന്ദ്ര സര്‍ക്കാര്‍ നടപടി ചൊവ്വാഴ്ച സുപ്രീം കോടതി ചീഫ് ജസ്റ്റീസ് അധ്യക്ഷനായ മൂന്നംഗ ബെഞ്ച് റദ്ദാക്കിയിരുന്നു. ഇതിനു പിന്നാലെയാണ് വീണ്ടും അലോക് വര്‍മ്മയ്ക്കെതിരെ നടപടി ഉണ്ടായത്. ജനുവരി 31 വരെയായിരുന്നു അദ്ദേഹത്തിന്‍റെ കാലാവധി.