കൊവിഡ് വാക്സിൻ കിട്ടാൻ 'ഇ-മെയിൽ വഴി രജിസ്റ്റർ ചെയ്തോ'? തട്ടിപ്പിൽ വീഴരുതെന്ന് സർക്കാർ മുന്നറിയിപ്പ്

ന്യൂഡൽഹി: രാജ്യത്ത് കൊവിഡ് 19 വാക്സിൻ കുത്തിവെയ്പ്പ് ആരംഭിക്കാൻ ദിവസങ്ങള്‍ മാത്രം ബാക്കി നിൽക്കേ വാക്സിൻ വിതരണത്തിൻ്റെ പേരിൽ തട്ടിപ്പുകാരും രംഗത്ത്. കൊവിഡ് വാക്സിൻ ആദ്യം ലഭിക്കാനായി ഇ-മെയിൽ വഴി രജിസ്റ്റര്‍ ചെയ്യണമെന്ന് അറിയിച്ച് ആളുകള്‍ക്ക് ഇമെയിലുകള്‍ ലഭിക്കുന്നുണ്ടെന്നാണ് റിപ്പോര്‍ട്ട്. കേന്ദ്ര ആഭ്യന്തര മന്ത്രാലയത്തിൻ്റെ നിയന്ത്രണത്തിലുള്ള ഔദ്യോഗിക ട്വിറ്റര്‍ ഹാൻഡിലായ സൈബര്‍ ദോസ്താണ് ഇതു സംബന്ധിച്ച് മുന്നറിയിപ്പ് നല്‍കിയത്.

ആളുകളെ വഞ്ചിക്കാനായി തട്ടിപ്പുകാര്‍ രംഗത്തെത്തിയിട്ടുണ്ടെന്നും ആളുകള്‍ ജാഗ്രത പാലിക്കണമെന്നും കേന്ദ്രസര്‍ക്കാര്‍ വ്യക്തമാക്കി. ഒരു തുക അടച്ചു രജിസ്റ്റര്‍ ചെയ്യാൻ ആളുകളോട് ആവശ്യപ്പെടുന്ന ഇ മെയിലിൽ രജിസ്റ്റര്‍ ചെയ്യുന്നവര്‍ക്ക് വാക്സിൻ വിതരണത്തിൽ മുൻഗണന ലഭിക്കുമെന്നും വാഗ്ദാനമുണ്ട്. ഇമെയിലായോ ടെക്സ്റ്റ് മെസ്സേജുകളായോ ഫോൺ കോളിലൂടെയോ ലഭിക്കുന്ന ഇത്തരം വാഗ്ദാനങ്ങളിൽ വഞ്ചിതരാകരുതെന്നും കേന്ദ്ര ആഭ്യന്തര മന്ത്രാലയം മുന്നറിയിപ്പ് നല്‍കി.


Also Read: 'പോലീസുകാരനെതിരെ നടപടി', 'സർക്കാർ ജോലി'; കളക്ടറുടെ വാക്ക് വിശ്വസിക്കാമെന്ന് ദമ്പതിമാരുടെ മക്കൾ

"കൊവിഡ് 19 സംബന്ധിച്ച് ജനങ്ങള്‍ക്കുള്ള ആശങ്ക മുതലെടുക്കാൻ സൈബര്‍ ക്രിമിനലുകള്‍ പലവിധ തന്ത്രങ്ങളും പയറ്റുന്നുണ്ട്. ചില ലിങ്കുകള്‍ വഴിയോ മെയിലിലൂടെയോ ഫോൺ കോളിലൂടെയോ കൊറോണ വാക്സിൻ ആദ്യം ലഭിക്കുമെന്ന വാഗ്ദാനവുമായി അവര്‍ എത്തും. ജാഗ്രത പാലിക്കുക, അല്ലെങ്കിൽ വഞ്ചിക്കപ്പെടാൻ സാധ്യതയുണ്ട്." ട്വീറ്റിൽ പറയുന്നു.

Also Read: ചെന്നിത്തല തൃപ്പെരുംതുറ പഞ്ചായത്തിൽ എൽഡിഎഫിന് നിരുപാധിക പിന്തുണ നൽകാൻ യുഡിഎഫ് തീരുമാനം

വാക്സിൻ വിതരണം സംബന്ധിച്ച ഏതൊരു അറിയിപ്പുകളും പത്രങ്ങളും വാര്‍ത്താ ചാനലുകളും ഉള്‍പ്പെടെയുള്ള മാധ്യമങ്ങലിലൂടെയും സര്‍ക്കാരിൻ്റെ ഔദ്യോഗിക സോഷ്യൽ മീഡിയ ചാനലുകള്‍ വഴിയും മാത്രമായിരിക്കും ലഭിക്കുക. ഇതല്ലാതെ ആദ്യം വാക്സിൻ ലഭ്യമാക്കാമെന്ന വാഗ്ദാനവുമായി എത്തുന്ന സന്ദേശങ്ങള്‍ തട്ടിപ്പു മാത്രമാണ്.

അഥവാ ഇത്തരത്തിൽ ലഭിക്കുന്ന സന്ദേശങ്ങളിലെ ലിങ്കുകളിൽ ക്ലിക്ക് ചെയ്തു തുറന്നാലും അതിൽ വ്യക്തിവിവരങ്ങളോ ബാങ്ക് അക്കൗണ്ട് വിവരങ്ങളോ പാസ്‍‍വേഡുകളോ നല്‍കാൻ പാടില്ല. ഇത്തരത്തിൽ പണം തട്ടിച്ചെടുക്കാനും സാധ്യതയുണ്ട്. ഇത്തരത്തിൽ ഏതെങ്കിലും സന്ദേശങ്ങള്‍ ലഭിച്ചതാൽ അത് റിപ്പോര്‍ട്ട് ചെയ്യുകയും ചെയ്യേണ്ടതാണ്.