സക്കീര്‍ നായിക്കിനെതിരെ ശക്തമായ നടപടിക്ക് സാധ്യത

ന്യൂഡൽഹി: സക്കീർ നയിക്കിനെതിരെ കേന്ദ്ര സർക്കാർ ശക്തമായ നടപടിയെടുക്കാൻ ഒരുങ്ങുന്നതായി സൂചന. നായിക്കിന്‍റെ ഐആർഎഫ് എന്ന എൻജിഒ തികച്ചും നിയമവിരുദ്ധമായാണ് പ്രവർത്തിച്ചതെന്നും സർക്കാർ അന്വേഷണത്തിൽ കണ്ടെത്തി. 50ൽ പരം ആളുകളെയാണ് നായിക് തന്‍റെ സംഘടനയിലൂടെ തീവ്രവാദത്തിലേക്ക് നയിച്ചത്.

ധാക്ക ആക്രമണത്തിൽ സാക്കീർ നായിക്കിന്‍റെ പങ്കിനെപ്പറ്റി സൂചന ലഭിച്ചതോടെയാണ് നായിക്കിനെതിരെ ശക്തമായ അന്വേഷണം ആരംഭിച്ചത്. നായിക്കിനുമേൽ യുഎപിഎ ചുമത്താനാണ് കേന്ദ്രത്തിന്‍റെ നീക്കം. നായിക്കിന്‍റെ വിവാദ പ്രസംഗങ്ങൾ ധാക്ക ആക്രമണത്തിന് വഴിയൊരുക്കി എന്നത് കൂടാതെ ജിഹാദ് പ്രചരിപ്പിക്കുന്ന പ്രവർത്തനങ്ങൾക്കും നായിക് നേതൃത്വം നൽകിയെന്ന് മഹാരാഷ്ട്ര പോലീസും കണ്ടെത്തി.

ഔറംഗബാദ് ആയുധ ഇടപാടിൽ പിടിയിലായ മുൻ ഐആർഎഫ് പ്രവർത്തകനായ ഫിറോസ് ദേശ്മുഖ്,ഇന്ത്യൻ മുജാഹിദീൻ അംഗം ഖതീൽ അഹ്മദ് സിദ്ദിഖി എന്നിവർ ഉൾപ്പടെയുള്ളവർ നായിക്കിനെതിരെ ശക്തമായ മൊഴി അന്വേഷണ സംഘത്തിന് നൽകിയിട്ടുണ്ട്. ഐആർഎഫ് എന്ന സംഘടനയെ നിരോധിക്കാനും സർക്കാർ പദ്ധതിയിടുന്നുണ്ട്. മലയാളികൾ കേരളത്തിന്‍റെ വിവിധ ഭാഗങ്ങളിൽ നിന്ന് കാണാതായി ഐഎസിൽ ചേർന്നതില്‍ നായിക്കിന്‍റെയും ഐആർഎഫിന്‍റെയും പങ്ക് എൻഐഎ അന്വേഷിക്കുന്നുണ്ട്.