മിണ്ടാതിരിക്കാന്‍ ജെഎന്‍യു മുതിര്‍ന്ന വിദ്യാര്‍ത്ഥികള്‍ക്ക് പെന്‍ഷന്‍ ഏര്‍പ്പെടുത്തണം: നിര്‍ദ്ദേശവുമായി ബാബാ രാംദേവ്

ന്യൂഡല്‍ഹി: ജവഹര്‍ലാല്‍ നെഹ്രു യൂണിവേഴ്സിറ്റിയിലെ മുതിര്‍ന്ന വിദ്യാര്‍ത്ഥികള്‍ക്ക് പെന്‍ഷന്‍ ഏര്‍പ്പെടുത്തണമെന്ന നിര്‍ദ്ദേശവുമായി യോഗാ ഗുരു ബാബാ രാംദേവ്. ജെഎന്‍യുവിലെ സമരം അവസാനിപ്പിക്കുന്നതിന്റെ ഭാഗമായാണ് ഇത്തരത്തില്‍ ഒരു നിര്‍ദ്ദേശം അദ്ദേഹം മുന്നോട്ട് വച്ചത്. പെന്‍ഷന്‍ സ്കീം കൊണ്ടുവന്നാല്‍ അവര്‍ പഠനത്തില്‍ ശ്രദ്ധിക്കുമെന്നും മറ്റു കാര്യങ്ങളില്‍ ഇടപെടില്ലെന്നും അദ്ദേഹം പറയുന്നു.

'ഞാന്‍ ജെഎന്‍യുവിലെ മുതിര്‍ന്ന വിദ്യാര്‍ത്ഥികള്‍ക്ക് പെന്‍ഷന്‍ നല്‍കുന്ന പദ്ധതി തുടങ്ങണമെന്നാണ് സര്‍ക്കാരിനോട് ആവശ്യപ്പെടുന്നത്. അങ്ങിനെയെങ്കില്‍ ജെഎന്‍യുവിലെ മിണ്ടാതിരുന്ന് പഠനത്തില്‍ ശ്രദ്ധിക്കാന്‍ സാധിക്കും' അദ്ദേഹം പറഞ്ഞു. പ്രതിഷേധം രാഷ്ട്രീയ പാര്‍ട്ടികള്‍ക്ക് വിട്ടു നല്‍കി വിദ്യാര്‍ത്ഥികള്‍ പഠിക്കണമെന്നും അദ്ദേഹം പറഞ്ഞു. ഭരണഘടനാ ക്ലബ്ബ് ഇവിടെയുണ്ടല്ലോ എന്ന് പരിഹാസ രൂപേണ മാധ്യമങ്ങളെ ചൂണ്ടിക്കാട്ടിയും അദ്ദേഹം പറഞ്ഞു.

Also Read: പാകിസ്ഥാനി ഹിന്ദുക്കളെക്കുറിച്ചല്ല, ഇന്ത്യയിലെ മുസ്ലീങ്ങളെക്കുറിച്ചാണ് ആശങ്ക: കെജ്‍‍രിവാൾ

കേന്ദ്ര സര്‍ക്കാരിന്റെ പൗരത്വ ഭേദഗതി നിയമത്തെ അനുകൂലിച്ച രാംദേവ് അന്താരാഷ്ട്ര തലത്തില്‍ ഇന്ത്യയുടെ പ്രതിച്ഛായ തകര്‍ത്ത് അപകീര്‍ത്തിപ്പെടുത്താനുള്ള ശ്രമമാണ് നടക്കുന്നതെന്നും യോഗാഗുരു കുറ്റപ്പെടുത്തി. ചില രാഷ്ട്രീയ പാര്‍ട്ടികളും വിദേശ ശക്തികളും ഏതാനും ചില വര്‍ഗ്ഗീയ സംഘടനകളും ചേര്‍ന്ന് സിഎഎയുടെ പേരില്‍ ന്യൂനപക്ഷങ്ങളെ ഭയപ്പെടുത്തുകയാണെന്നും അദ്ദേഹം ആരോപിച്ചു.

ഒരു രാഷ്ട്രീയ നേതാവിനും രാഷ്ട്രീയ പാര്‍ട്ടിക്കും ആരുടേയും പൗരത്വം എടുത്ത് കളയാന്‍ സാധിക്കില്ല. ജനങ്ങള്‍ റോഡില്‍ ഇറങ്ങിയുള്ള പ്രതിഷേധം അവസാനിപ്പിക്കുകയും പൊതുസ്വത്ത് നശിപ്പിക്കാതിരിക്കുകയും വേണമെന്നും അദ്ദേഹം പറഞ്ഞു. രാജ്യത്ത് വിഭവങ്ങള്‍ കുറവായതിനാല്‍ ജനസംഖ്യാ നിയന്ത്രണം ആവശ്യമായ കാര്യമാണ്. ഇതിനായി കര്‍ശനമായ നിയമങ്ങള്‍ കൊണ്ടുവരണം. മൂന്നാമത്തെ കുട്ടിക്ക് ജന്മം നല്‍കിയാല്‍ പിഴയ്ക്ക് പുറമെ വോട്ടവകാശവും റദ്ദാക്കണമെന്നും അദ്ദേഹം മാധ്യമങ്ങളോട് പറഞ്ഞു.

പതഞ്ജലി ആയുര്‍വേദ ലിമിറ്റഡിന്റെ പുതിയ ഉത്പന്നമായ രുചി സോയ എന്ന എണ്ണ പുറത്തിറക്കുന്നതിന്റെ ഭാഗമായിട്ടാണ് ബാബാ രാംദേവ് വാര്‍ത്താസമ്മേളനം വിളിച്ചത്.