ജമ്മു കശ്മീരില്‍ ഇനി ഗവര്‍ണർ ഭരണം

ശ്രീനഗര്‍: ജമ്മു കശ്മീരില്‍ ഗവര്‍ണര്‍ ഭരണം ഏര്‍പ്പെടുത്തിയുള്ള ഉത്തരവ് രാഷ്ട്രപതി രാംനാഥ് കോവിന്ദ് പുറത്തിറക്കി. ജമ്മു കാശ്മീർ ഗവർണർ എൻ.എൻ വോറയുടെ ശുപാര്‍ശയില്‍ ഇന്ന് രാവിലെയോടെയാണ് രാഷ്ട്രപതി ഒപ്പുവെച്ചിരിക്കുന്നത്. കശ്മീര്‍ ഗവര്‍ണര്‍ ഭരണത്തിലേക്ക് കടക്കുമെന്നായതോടെ സുരക്ഷാകാര്യങ്ങള്‍ സംബന്ധിച്ച് ഡല്‍ഹിയില്‍ എസ്.പി വയീദിന്‍റെ നേതൃത്വത്തിൽ നിര്‍ണായക ചര്‍ച്ചകള്‍ നടന്നിരുന്നു. സ്ഥിതിഗതികള്‍ വിലയിരുത്താന്‍ ആഭ്യന്തര മന്ത്രിയും ഇന്നലെ ഉന്നതതലയോഗം ചേര്‍ന്നു. പ്രതിരോധ മന്ത്രി നിര്‍മ്മല സീതാരാമന്‍ ഇന്ന് കശ്മീരിലെത്തുന്നുമുണ്ട്.

ജമ്മു കശ്മീരില്‍ മെഹ്‍ബൂബ മുഫ്തിയുടെ പി.ഡി.പിക്ക് ബി.ജെ.പി നല്‍കിയിരുന്ന പിന്തുണ ഇന്നലെ പിന്‍വലിച്ചിരുന്നു. ഇതോടെ മുഖ്യമന്ത്രി സ്ഥാനത്ത് നിന്ന് മെഹ്‍ബൂബ രാജിവെക്കുകയും സര്‍ക്കാര്‍ താഴെ വീഴുകയും ചെയ്തു. ഇനിയൊരു സഖ്യ സര്‍ക്കാരിനുള്ള സാധ്യതയില്ലെന്ന് മറ്റു പാര്‍ട്ടികളായ നാഷണല്‍ കോണ്‍ഫ്രന്‍സും കോണ്‍ഗ്രസും വ്യക്തമാക്കിയതോടെയാണ് സംസ്ഥാനത്ത് ഗവര്‍ണര്‍ ഭരണം സംജാതമായത്.