നികുതി വെട്ടിപ്പിന് കൈക്കൂലി: ജിഎസ്‍‍ടി കമ്മീഷണര്‍ അടക്കമുള്ളവര്‍ പിടിയിൽ

ന്യൂ ഡൽഹി: കേന്ദ്ര എക്സൈസ് നികുതി വെട്ടിക്കാൻ കൂട്ടുനിന്നതിന് ഒരു ജിഎസ്ടി കമ്മീഷണറെയും സഹപ്രവര്‍ത്തകരെയും സിബിഐ അറസ്റ്റ് ചെയ്തു. ജിഎസ്‍‍ടി കമ്മീഷണര്‍ സൻസാര്‍ ചന്ദിന് പ്രതിഫലമായി ഒരു മൊബൈൽഫോണും ടിവിയും ഫ്രിഡ്ജുമാണ് ലഭിച്ചത്. ഇയാളുടെ സഹായിയുടെ പക്കൽനിന്നും 1.5 ലക്ഷം രൂപയും കണ്ടെടുത്തിട്ടുണ്ട്. പ്രതിഫലമായി പല തവണയായാണ് പ്രതികള്‍ കൈക്കൂലി വാങ്ങിയതെന്ന് സിബിഐ അറിയിച്ചു.

ജി.എസ്.ടി കമ്മീഷണര്‍ക്ക് പുറമെ അജയ് ശ്രാവാസ്തവ, അമന്‍ഷ, രാജീവ് സി ചന്ദാല്‍, സൗരഭ് പാണ്ഡെ എന്നീ സഹപ്രവര്‍ത്തകര്‍ ഉള്‍പ്പെടെ ഇടപാടുമായി ബന്ധമുള്ള മറ്റുചിലരെയും സിബിഐ അറസ്റ്റ് ചെയ്തിട്ടുണ്ട്.

ഇവരുടെ ഓഫീസുകളില്‍ നിന്നും വീടുകളില്‍ നിന്നുമായി 58 ലക്ഷം രൂപ സിബിഐ കണ്ടെടുത്തു. കുറച്ചു കാലമായി ഇവര്‍ സ്വകാര്യ കമ്പനികള്‍ക്ക് നികുതി വെട്ടിക്കാൻ കൂട്ടുനിൽക്കുകയായിരുന്നുവെന്ന് സിബിഐ പറഞ്ഞു.