കലാകാരന്മാര്‍ കൊവിഡില്ലെന്ന പരിശോധനാഫലം കാണിക്കണം
സാംസ്‌കാരിക പരിപാടികള്‍ സംഘടിപ്പിക്കാന്‍ കേന്ദ്രസര്‍ക്കാര്‍ അനുമതി നല്‍കിയിരിക്കുന്ന സാഹചര്യത്തില്‍ പരിപാടികള്‍ക്ക് എത്തുന്ന കലാകാരന്മാര്‍ കൊവിഡില്ലെന്ന പരിശോധനാ ഫലം കാണിക്കേണ്ടതാണ്. ഇവര്‍ മേക്കപ്പ് വീട്ടില്‍ നിന്നു തന്നെ പൂര്‍ത്തിയാക്കാന്‍ ശ്രമിക്കണം. പരമാവധി 200 പേരെ വരെ മാത്രമേ ഓഡിറ്റോറിയങ്ങളില്‍ പരിപാടികള്‍ കാണാന്‍ അനുവദിക്കുകയുള്ളൂ. തുറസായ സ്ഥലങ്ങളില്‍ ആറടി അകലം വിട്ട് മാത്രമേ കാണികളെ ഇരുത്താവൂവെന്നും മാര്‍ഗനിര്‍ദേശത്തില്‍ വ്യക്തമാക്കുന്നു.
മാസ്‌കോ ഫേസ് ഷീല്‍ഡോ ധരിക്കണം
പരിപാടികള്‍ കാണാനെത്തുന്നവര്‍ നിര്‍ബന്ധമായും മാസ്‌കോ ഫേസ് ഷീല്‍ഡോ ധരിക്കേണ്ടതാണ്. വേദിയും സദസും പരിപാടിയ്ക്ക് മുമ്പേ തന്നെ അണുവിമുക്തമാക്കണം. പ്രവേശന കവാടത്തിലും പുറത്തേക്കുള്ള വഴിയിലും നിര്‍ബന്ധമായും സാനിറ്റൈസര്‍ കരുതേണ്ടതാണ്. ഉപയോഗിച്ച മാസ്‌കുകള്‍ ഉപേക്ഷിക്കുന്നതിന് വേസ്റ്റ് ബിന്നുകള്‍ സ്ഥാപിക്കണം. തുപ്പുന്നതിന് കടുത്ത നിയന്ത്രണമുണ്ടാകും.
മേക്കപ്പ് വീട്ടില്‍ നിന്നു തന്നെ ചെയ്യാന്‍ ശ്രമിക്കണം
പരിപാടിയില്‍ പങ്കെടുക്കുന്ന കലാകാരന്മാരും കലാകാരികളും എല്ലായ്‌പ്പോഴും മാസ്‌ക് ധരിക്കണം. ഗ്രീന്‍ റൂമുകളുടെ ഉപയോഗം പരമാവധി കുറയ്ക്കണം. മേക്കപ്പും വസ്ത്രധാരണവും വീടുകളില്‍ നിന്നു തന്നെ ചെയ്യാന്‍ ശ്രമിക്കണം. പരിപാടി അവതരിപ്പിക്കുന്നവര്‍ക്ക് വേണ്ടിയുള്ള ശുചിമുറികള്‍ വൃത്തിയുള്ളതായിരിക്കണം. കൊവിഡിനെ കുറിച്ച് സംഘാടകര്‍ ജീവനക്കാര്‍ക്ക് പരിശീലനം നല്‍കണം. പരിപാടിയുടെ അവതാരകര്‍ കൊവിഡ് നെഗറ്റീവ് ഫലം കൈയ്യില്‍ കരുതണം.
തെര്‍മല്‍ സ്‌ക്രീനിങ് നിര്‍ബന്ധം
പ്രവേശന കവാടത്തില്‍ വെച്ച് എല്ലാ സന്ദര്‍ശകര്‍ക്കും തെര്‍മല്‍ സ്‌ക്രീനിങ് നടത്തണം. ലക്ഷണമില്ലാത്തവര്‍ക്ക് മാത്രമേ പരിപാടിയില്‍ പ്രവേശനം നല്‍കാവൂ. പരിപാടി കഴിഞ്ഞാല്‍ സന്ദര്‍ശകരെല്ലാം ക്യൂ പാലിച്ച് പുറത്തേക്ക് കടക്കണം. പരിപാടി അവതരിപ്പിക്കുന്നവര്‍ക്ക് ഭക്ഷണം കൊണ്ടുവരാം. ഭക്ഷണം കഴിക്കുന്നയിടത്ത് ശാരീരിക അകലം പാലിക്കണം. ലഘു ഭക്ഷണശാലകളില്‍ ആള്‍ക്കൂട്ടം അനുവദിക്കില്ല. ഓഡിറ്റോറിയത്തിന് അകത്ത് ഭക്ഷണവും പാനീയവും അനുവദിക്കില്ല.