24 വര്‍ഷത്തോളമായി ഒളിവില്‍; ദാവൂദിന്‍റെ കൂട്ടാളിയായ മലയാളി പിടിയില്‍

ന്യൂഡല്‍ഹി: അധോലോക കുറ്റവാളി ദാവൂദ് ഇബ്രാഹിമിന്റെ കൂട്ടാളിയായ മലയാളി പിടിയില്‍. അബ്ദുള്‍ മജീദ് കുട്ടിയാണ് പിടിയിലായത്. 24 വര്‍ഷത്തോളമായി ഒളിവിലായിരുന്നു. ഗുജറാത്ത് എടിഎസ് അറസ്റ്റ് ചെയ്‌തെന്ന് വാര്‍ത്താ ഏജന്‍സി റിപ്പോര്‍ട്ട് ചെയ്തു. ഇയാള്‍ നിരവധി ക്രിമിനല്‍ കേസുകളില്‍ പ്രതിയാണ്.

Also Read: Live: കര്‍ഷക സമരം: ഒരാള്‍ കൂടി ആത്മഹത്യ ചെയ്തു

106 പിസ്റ്റളുകളും 750 ഓളം വെടിയുണ്ടകളും 4 കിലോ ആര്‍ഡിഎക്‌സും ശേഖരിക്കുന്നതില്‍ പങ്കാളി ആയിരുന്നു. 1996 ലാണ് സംഭവം. കേസിലെ മറ്റെല്ലാ പ്രതികളും അറസ്റ്റിലായപ്പോള്‍ അബ്ദുള്‍ മജീദ് മാത്രം ഒളിവിലായിരുന്നു. അബ്ദുള്‍ മജീദ് നിലവില്‍ എവിടെയാണെന്ന വിവരം ലഭിക്കുകയും ജാര്‍ഖണ്ഡിലേക്ക് സംഘത്തെ അയയ്ക്കുകയും അറസ്റ്റ് ചെയ്യുകയും ആയിരുന്നെന്ന് എടിഎസ് അധികൃതര്‍ പറഞ്ഞു.

Also Read: രോഗവ്യാപനം അതിരൂക്ഷം; കൊവിഡില്‍ 'കേരളം' മുന്നില്‍, ആറ് മാസത്തിനിടെ സംഭവിച്ചതെന്ത്?

ഗുജറാത്തിലും മുംബൈയിലും സമാധാനം തകര്‍ക്കാന്‍ ദാവൂദ് ഇബ്രാഹിമും സംഘടനയും പദ്ധതി ഇട്ടിരുന്നു. ഇതിന്റെ ഭാഗമായാണ് ഇത്രയധികം ആയുധങ്ങളും ആര്‍ഡിഎക്‌സും ശേഖരിച്ചത്. മറ്റ് പ്രതികളെ ചോദ്യം ചെയ്തതിന് ശേഷമാണ് അബ്ദുള്‍ മജീദിന്റെ പേര് പുറത്തു വന്നതെന്നും അന്ന് മുതല്‍ ഒളിവില്‍ കഴിയുകയായിരുന്നെന്നും എടിഎസ് അധികൃതര്‍ പറഞ്ഞു. പിടിയിലായ അബ്ദുള്‍ മജീദിനെ കൊവിഡ് പരിശോധനയ്ക്ക് വിധേയമാക്കിയതിന് ശേഷം കൂടുതല്‍ ചോദ്യം ചെയ്യുമെന്ന് എടിഎസ് അധികൃതര്‍ അറിയിച്ചു.