ഗുജറാത്തില്‍ ബിജെപി കനത്ത തോല്‍വി ഏറ്റുവാങ്ങുമെന്ന് യോഗേന്ദ്ര യാദവ്

ഗാന്ധിനഗര്‍: ഗുജറാത്ത് നിയമസഭാ തെരഞ്ഞെടുപ്പില്‍ ബിജെപി കനത്ത തോല്‍വി ഏറ്റുവാങ്ങുമെന്ന് തെരഞ്ഞെടുപ്പ് വിദഗ്ദനും മുന്‍ എഎപി നേതാവുമായ യോഗേന്ദ്രയാദവ്. ഗുജറാത്തില്‍ ബിജെപിയുടെ കണക്കു കൂട്ടലുകള്‍ തെറ്റുമെന്നും കോണ്‍ഗ്രസ് അധികാരത്തില്‍ വരുമെന്നും ഗുജറാത്ത് തെരഞ്ഞെടുപ്പുമായി ബന്ധപ്പെട്ട് ഇതുവരെ നടത്തിയ സര്‍വ്വേകളെ അധികരിച്ച് യോഗേന്ദ്ര യാദവ് പറഞ്ഞു.

ട്വിറ്ററിലൂടെയാണ് യോഗേന്ദ്രയാദവ് കോണ്‍ഗ്രസ് അനുകൂല പ്രവചനം നടത്തിയിരിക്കുന്നത്. മൊത്തത്തില്‍ മൂന്ന് സാധ്യതകളാണ് അദ്ദേഹം പ്രവചിക്കുന്നത്. ഒന്നുകില്‍ 43 ശതമാനം വോട്ടുകളോടെ ബിജെപി 86 സീറ്റ് നേടും. എന്നാല്‍ 92 സീറ്റ് കോണ്‍ഗ്രസിന് ലഭിക്കും. അല്ലെങ്കില്‍ 113 സീറ്റ് കോണ്‍ഗ്രസിന് ലഭിക്കുമ്പോള്‍ ബിജെപിയ്ക്ക് 41 ശതമാനം വോട്ടുകളോടെ 65 സീറ്റ് മാത്രമാണ് ലഭിക്കുകയെന്നും യോഗേന്ദ്രയാദവ് വ്യക്തമാക്കുന്നു.

അതും അല്ലെങ്കില്‍ തെരഞ്ഞെടുപ്പ് ഫലം പ്രവചനാതീതമാകുമെന്നും അദ്ദേഹം പറയുന്നു. ജനവികാരം ബിജെപിക്ക് അനുകൂലമല്ലെന്നാണ് അദ്ദേഹം പറയുന്നത്. ഓഗസ്റ്റില്‍ നടത്തിയ സര്‍വ്വെ പ്രകാരം ബിജെപി 30 ശതമാനം ലീഡ് നേടേണ്ടതാണ്. എന്നാല്‍ ഒക്ടോബറില്‍ ലീഡ് ആറ് ശതമാനമായി കുറഞ്ഞു. നവംബറില്‍ പൂജ്യം ശതമാനമായെന്നും യോഗേന്ദ്ര യാദവ് ചൂണ്ടിക്കാട്ടുന്നു.