വിദ്യാർത്ഥികൾക്കൊപ്പം ഡാൻസ് കളിച്ചും സിനിമാ ഡയലോഗ് പറഞ്ഞും സണ്ണി ഡിയോൾ എംപി

ബട്ടാല (പഞ്ചാബ്)∶ മണ്ഡലത്തിലെ പൊതുപരിപാടിയില്‍ ഡാൻസ് കളിച്ചും സിനിമാ ഡയലോഗ് പറഞ്ഞും ബിജെപി എംപി സണ്ണി ഡിയോൾ. പഞ്ചാബിലെ ഗുരുദാസ്പൂര്‍ മണ്ഡലത്തില്‍ ഒരു കോളജില്‍ നടന്ന ചടങ്ങിലാണ് 63കാരനായ താരം ചുവടുകള്‍ വച്ചത്.

ഇന്ത്യാ പാക്ക് വിഭജനത്തിന്റെ കഥ പറഞ്ഞ ഗാഡര്‍ ഏക് പ്രേം കഥ എന്ന ചരിത്രസിനിമയിലെ ഗാനത്തിനാണ് കോളജ് വിദ്യാര്‍ത്ഥികൾക്കൊപ്പം ചുവട് വച്ചത്. ഇതിനൊപ്പം ദാമിനി എന്ന ചിത്രത്തിലെ ഡയലോഗും വേദിയില്‍ പറഞ്ഞു. ഇതിന്റെ വീഡിയോ വാര്‍ത്താ ഏജന്‍സിയായ എഎന്‍ഐ ട്വിറ്റ് ചെയ്തിട്ടുണ്ട്.

Also Read : കരസേനയിൽ സ്‌ത്രീകൾക്ക് സുപ്രധാന പദവികളാകാമെന്ന് സുപ്രീംകോടതി

'നിങ്ങള്‍ക്ക് എല്ലാവിധ സൗകര്യങ്ങളും ലഭിച്ചതിനാല്‍ നിങ്ങള്‍ അനുഗ്രഹീതരാണ്. എല്ലാ ആളുകള്‍ക്കും ഇത്തരത്തില്‍ അനുഗ്രഹം ലഭിക്കണമെന്നില്ല. നിങ്ങളുടെ മാതാപിതാക്കള്‍ എന്തൊക്കെ പറഞ്ഞാലും ചെയ്താലും അതെല്ലാം നിങ്ങളുടെ നന്മയ്ക്ക് വേണ്ടിയാണ്. നിങ്ങള്‍ അവര്‍ പറയുന്നത് അനുസരിക്കണമെന്നും' അദ്ദേഹം പഞ്ചാബി ഭാഷയില്‍ വിദ്യാര്‍ത്ഥികളോട് പറഞ്ഞു. ഇതിന്റെ വീഡിയോ അദ്ദേഹം ഫെയ്സ്ബുക്കില്‍ പങ്കുവച്ചിരുന്നു.


രാഷ്ട്രീയത്തില്‍ ആദ്യമായി ചുവട് വയ്ക്കുന്നതെങ്കിലും തുടക്കകാലം മുതല്‍ക്കെ വിവാദങ്ങളുടെ തോഴനായിരുന്നു ബോളിവുഡ് താരം സണ്ണി ഡിയോള്‍. പഞ്ചാബിലെ ഗുരുദാസ്പൂര്‍ മണ്ഡലത്തില്‍ നിന്നും മത്സരിച്ച് ജയിച്ച സണ്ണി ഡിയോള്‍ തനിക്ക് പകരം പ്രതിനിധിയെ മണ്ഡലത്തില്‍ നിയോഗിച്ചാണ് ആദ്യം വിവാദത്തില്‍ പെട്ടത്. എഴുത്തുകാരനായ ഗുല്‍പ്രീത് സിങ്ങ് പല്‍ഹേരിയെയാണ് ഇത്തരത്തില്‍ പ്രതിനിധിയായി അദ്ദേഹം ഏര്‍പ്പെടുത്തിയത്.

എംപിയെ കാണാനില്ലെന്ന തരത്തില്‍ പോസറ്ററുകളും പഞ്ചാബിലെ പത്താന്‍കോട്ട് പ്രദേശത്ത് വന്നിരുന്നു. കാണാതായ എംപി സണ്ണി ഡിയോളിനെ തിരയുന്നു, എന്ന് എഴുതിയ പോസ്റ്ററാണ് നഗരത്തിന്റെ വിവിധ ഭാഗങ്ങളില്‍ ഒട്ടിച്ചത്. മണ്ഡലത്തിലേക്ക് തിരിഞ്ഞു നോക്കാത്തതാണ് ഇത്തരത്തില്‍ വിമര്‍ശനത്തിന് കാരണമായത്. പാര്‍ലമെന്റ് സെഷനില്‍ 37 ദിവസത്തില്‍ ഒന്‍പത് ദിവസം മാത്രമാണ് ഹാജരായിരുന്നത്.