മാര്‍ തോമസ് തെന്നാട്ട് കാറപകടത്തിൽ മരിച്ചു

മധ്യപ്രദേശ്: ഗ്വാളിയാര്‍ രൂപതാ ബിഷപ്പ് മാര്‍ തോമസ് തെന്നാട്ട് കാറപകടത്തിൽ മരിച്ചു. രൂപതയുടെ കീഴിലുള്ള സ്‌കൂളിലെ വാർഷികാഘോഷ പരിപാടികളിൽ പങ്കെടുത്ത ശേഷം ബിഷപ്പ് ഹൗസിലേക്ക് മടങ്ങും വഴിയായിരുന്നു അപകടം. 63 വയസ്സായിരുന്നു. നാട്ടുകാര്‍ ചേര്‍ന്ന് ഉടൻ തൊട്ടടുത്തുള്ള ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കാറോടിച്ചിരുന്ന ഡ്രൈവര്‍ക്കും സാരമായ പരിക്കേറ്റിട്ടുണ്ട്. റോഡിൽ കാര്‍ തെന്നി തലകീഴായി മറിഞ്ഞതോടെ തലക്കേറ്റ ഗുരുതര പരിക്കാണ് ബിഷപ്പിന്‍റെ മരണകാരണമായതെന്ന് ആശുപത്രി അധികൃതര്‍ വ്യക്തമാക്കി.

2016 ഒക്ടബോര്‍ 18നായിരുന്നു കോട്ടയം ഏറ്റുമാനൂര്‍ സെന്‍റ് ജോസഫ് ക്നാനായ ഇടവകാംഗമായ അദ്ദേഹത്തെ മാര്‍പ്പാപ്പ ഗ്വാളിയാര്‍ ബിഷപ്പായി നിയമിച്ചത്. 1999 ലാണ് ഭോപ്പാല്‍ അതിരൂപതയുടെ കീഴിൽ ഗ്വാളിയാര്‍ രൂപത സ്ഥാപിച്ചത്. സഹോദരങ്ങള്‍: ഏലിയാമ്മ, ജോസഫ്, മേരി, ക്ലാരമ്മ, ലിസി എന്നിവരാണ്.