കുറ്റം ചെയ്യുന്ന ആള്‍ദൈവങ്ങളെ തൂക്കിക്കൊല്ലണം: രാംദേവ്

കോട്ട: കുറ്റകൃത്യങ്ങള്‍ ചെയ്യുന്ന ആള്‍ദൈവങ്ങളെ മരണം വരെ തൂക്കി കൊല്ലണമെന്ന് യോഗ ഗുരു രാംദേവ്. രാജസ്ഥാനിലെ കോട്ടയില്‍ മാധ്യമപ്രവര്‍ത്തകരെ അഭിസംബോധന ചെയ്ത് സംസാരിക്കുകയായിരുന്നു രാംദേവ്.

'തങ്ങളുടെ പരിധി ലംഘിച്ച് കുറ്റകൃത്യങ്ങള്‍ ചെയ്യുന്ന ആള്‍ദൈവങ്ങളെ ഒരിക്കലും ജയിലിലേക്ക് അയക്കരുത്. അവരെ മരണം വരെ തൂക്കിക്കൊല്ലണം. അതില്‍ ഒരു വിട്ടുവീഴ്ചയും പാടില്ല'- രാംദേവ് പറഞ്ഞു.

എല്ലാ ജോലിക്കും അതിന്റേതായ പരിമിതികള്‍ കാണും. എല്ലാ ജോലികള്‍ക്കും പെരുമാറ്റച്ചട്ടങ്ങളുമുണ്ട്. ബാബമാര്‍ക്കും ഇത് ബാധകമാണ്. കാവി വസ്ത്രങ്ങള്‍ ധരിച്ചതുകൊണ്ടുമാത്രം ഒരാളെ ബാബ എന്നു വിളിക്കാന്‍ കഴിയില്ല. എല്ലാം വ്യക്തിത്വത്തിലാണെന്നും രാംദേവ് പറഞ്ഞു.

പീഡനക്കേസില്‍ ഒരു ആള്‍ദൈവം അറസ്റ്റിലായ സംഭവത്തില്‍ പ്രതികരിക്കുകയായിരുന്നു രാംദേവ്. രണ്ടു വര്‍ഷം മുന്നേ ഷാനി ധാമില്‍ ബലാല്‍സംഗക്കേസില്‍ ദാതി മഹാരാജ് എന്ന ആള്‍ദൈവം കുറ്റക്കാരനാണെന്ന് കണ്ടെത്തിയിരുന്നു. ഈ കേസ് പിന്നീട് ഡല്‍ഹി പോലീസിന്‍റെ ക്രൈം ബ്രാഞ്ചിന് കൈമാറി.