വോട്ടിങ് മെഷീനുകള്‍ ചോര്‍ത്താൻ ബിജെപി എൻജിനീയര്‍മാര്‍ :ഹാര്‍ദിക്

അഹമ്മദാബാദ് ഗുജറാത്ത് തിരഞ്ഞെടുപ്പ് സംബന്ധിച്ച് വീണ്ടും ആരോപണവുമായി പാടീദാ‍ര്‍ പ്രക്ഷോഭ നേതാവ് ഹാര്‍ദിക് പട്ടേൽ. ഇലക്ട്രോണിക് വോട്ടിങ് മെഷീനുകള്‍ ചോര്‍ത്താൻ ബിജെപി എൻജിനീയര്‍മാരെ വാടകയ്ക്കെടുത്തുവെന്നാണ് ഹാര്‍ദികിന്‍റെ ട്വിറ്ററിലൂടെയുള്ള ആരോപണം. തിരഞ്ഞെടുപ്പ് ഫലം പുറത്തുവരാൻ മണിക്കൂറുകള്‍ മാത്രം ബാക്കി നിൽക്കെയാണ് ഹാര്‍ദികിന്‍റെ ആരോപണം.

4000 ഇവിഎമ്മുകള്‍ ചോര്‍ത്തിയിട്ടുണ്ടെന്നും അതിനായി അഹമ്മദാബാദിലെ കമ്പനിയിൽ നിന്നും 140 സോഫ്റ്റ്‍‍വെയര്‍ എൻജിനീയര്‍മാരെ ബിജെപി വാടകയ്ക്കെടുത്തെന്നും ഹാര്‍ദിക് പട്ടേൽ ആരോപിച്ചു. വൈസ്‍‍നഗര്‍, രത്നാപൂര്‍, വാവ് എന്നിവിടങ്ങളിലും പട്ടേൽ ഭൂരിപക്ഷ പ്രദേശങ്ങളിലും മെഷീൻ ചോര്‍ത്താനുള്ള ശ്രമങ്ങള്‍ നടന്നിട്ടുണ്ടെന്നും അദ്ദേഹം ആരോപിച്ചു.

എടിഎമ്മുകള്‍ ഹാക്ക് ചെയ്യാമെങ്കിൽ വോട്ടിങ് മെഷീനുകളും ചോര്‍ത്താമെന്നും വിഷയത്തിൽ ജില്ലാകളക്ടര്‍ മറുപടി പറയണമെന്നും ഹാര്‍ദിക് പട്ടേൽ ആവശ്യപ്പെട്ടിരുന്നു. എന്നാൽ ആരോപണം അടിസ്ഥാനരഹിതമാണെന്നും ഹാര്‍ദിക് പട്ടേലിന് വേണമെങ്കിൽ തിരഞ്ഞെടുപ്പ് കമ്മീഷനെ സമീപിക്കാമെന്നും ജില്ലാ കളക്ടര്‍ മറുപടി നല്‍കി.