ബിജെപിയ്ക്ക് മറുപടി കൊടുക്കാനായതിൽ സന്തോഷമെന്ന് ഹാര്‍ദിക് പട്ടേൽ

അഹമ്മദാബാദ്: ഗുജറാത്ത് നിയമസഭാ തിരഞ്ഞെടുപ്പിൽ 150 സീറ്റ് നേടുമെന്ന് പ്രഖ്യാപിച്ച ബിജെപിയ്ക്ക് മറുപടി കൊടുക്കാൻ സാധിച്ചതിൽ സന്തോഷമുണ്ടെന്ന് പട്ടേൽ സംവരണപ്രക്ഷോഭനേതാവ് ഹാര്‍ദിക് പട്ടേൽ. തിരഞ്ഞെടുപ്പിൽ കോണ്‍ഗ്രസിന്‍റെ സ്ഥിതി മെച്ചപ്പെടുത്തിയത് താനാണെന്നും ഹാര്‍ദിക് അവകാശപ്പെട്ടു.

2019ലെ തിരഞ്ഞെടുപ്പ് വരെ തനിക്ക് വിശ്രമമില്ല. ഇലക്ട്രോണിക് വോട്ടിങ് മെഷീനിൽ തിരിമറി നടത്തിയതുവഴി ബിജെപി പത്തുമുതൽ 12 സീറ്റുകള്‍ വരെ നേടിയിട്ടുണ്ട്. സൂറത്ത്, രാജ്കോട്ട് മേഖലകളിൽ വ്യാപകമായ തിരിമറി നടക്കുന്നതായി വോട്ടണ്ണലിനു മുൻപ് താൻ പറഞ്ഞിരുന്നുവെന്ന് ഓര്‍മപ്പെടുത്തിയ ഹാര്‍ദിക് അപകടം മണത്ത ബിജെപി വിജയത്തിനാവശ്യമായ സീറ്റുകളിലേയ്ക്ക് മാത്രം തിരിമറി ഒതുക്കുകയായിരുന്നുവെന്നും ആരോപിച്ചു.

തിരഞ്ഞെടുപ്പ് കമ്മീഷനെ വിശ്വാസമില്ലെന്നും പരാതിയുമായി ഹൈക്കോടതിയെ സമീപിക്കുമെന്നും ഹാര്‍ദിക് അറിയിച്ചു. അടുത്ത വര്‍ഷം തിരഞ്ഞെടുപ്പ് നടക്കാനിരിക്കുന്ന രാജസ്ഥാനിലും മധ്യപ്രദേശിലും ബിജെപിയ്ക്കെതിരെ പ്രചരണം നടത്തുമെന്നും ഹാര്‍ദിക് കൂട്ടിച്ചേര്‍ത്തു.