ഹാര്‍ദിക് പട്ടേലിന് രണ്ടു വര്‍ഷം ജയില്‍വാസം

വിസ്നഗര്‍: പാട്ടിദാർ അനാമത്ത് ആന്തോളൻ സമിതി (പാസ്) നേതാവ് ഹാര്‍ദിക് പട്ടേലിന് രണ്ടു വര്‍ഷം ജയില്‍ശിക്ഷ വിധിച്ചു. ഗുജറാത്തിലെ വിസ്നഗര്‍ കോടതിയാണ് ശിക്ഷ വിധിച്ചത്. 2015ല്‍ ഒരു പ്രതിഷേധ റാലി അക്രമാസക്തമായ കേസിലാണ് വിധി.

പട്ടേലിനൊപ്പം അനുയായികളായ ലാല്‍ജി പട്ടേല്‍, എ.കെ പട്ടേല്‍ എന്നിവര്‍ക്കും രണ്ടു വര്‍ഷത്തെ ജയില്‍വാസം വിധിച്ചിട്ടുണ്ട്. മൂന്നു പേര്‍ക്കും 50,000 രൂപ വീതം പിഴയും വിധിച്ചിട്ടുണ്ട്.

2015 ജൂലായില്‍ പട്ടേല്‍ സമുദായത്തിന്‍റെ പ്രതിഷേധറാലി നടക്കുന്നതിനിടെ വിസ്നഗര്‍ എം.എല്‍.എ. ഋഷികേശ് പട്ടേലിന്‍റെ ഓഫീസില്‍ അതിക്രമിച്ചു കയറി അക്രമം നടത്തിയെന്നും കവര്‍ച്ച നടത്തിയെന്നുമാണ് കേസ്. കേസില്‍ നേരത്തേ പ്രതികള്‍ക്ക് ജാമ്യം ലഭിച്ചിരുന്നു.