കൊവിഡ് വാക്സിൻ പരീക്ഷണത്തിന് വിധേയനായ ഹരിയാന ആരോഗ്യ മന്ത്രിയ്ക്ക് കൊവിഡ്

ന്യൂഡൽഹി: ഹരിയാന ആരോഗ്യമന്ത്രി അനിൽ വിജ്ജിന് കൊവിഡ്-19 സ്ഥിരീകരിച്ചു. നേരത്തെ ഭാരത് ബയോടെക് വികസിപ്പിച്ച കൊവിഡ് വാക്സിൻ പരീക്ഷണത്തിന് ഇദ്ദേഹം വിധേയനായിരുന്നു. നവംബർ 20നായിരുന്നു ഇദ്ദേഹം പരീക്ഷണ വാക്സിൻ സ്വീകരിച്ചത്.

താൻ കൊവിഡ് ബാധിതനാണെന്ന വാർത്ത അനിൽ വിജ് തന്നെയാണ് പുറത്ത് വിട്ടത്. നിലവിൽ അംബാലയിലെ ആശുപത്രിയിൽ ചികിത്സയിലാണ് അദ്ദേഹം. 'ഞാന്‍ കൊറോണ പൊസിറ്റീവാണ്. നിലവില്‍ അംബാലയിലെ സിവിൽ ഹോസ്പിറ്റലിൽ ചികിത്സയിൽ തുടരുകയാണ്. ഞാനുമായി സമ്പർക്കം പുലർത്തിയ ആളുകൾ ദയവായി കൊവിഡ് പരിശോധന നടത്തണം' മന്ത്രി ട്വീറ്റ് ചെയ്തു.

Also Read : രാജ്യത്ത് കൊവിഡ് കേസുകൾ 96 ലക്ഷം കടന്നു; 24 മണിക്കൂറിനിടെ 512 മരണങ്ങൾ


നവംബർ20ന് അംബാലയിൽ വെച്ച് തന്നെയാണ് അനിൽ വിജ് കൊവാക്സിൻ പരീക്ഷണത്തിന് വിധേയാനയിരുന്നത്. ഇതിന്‍റെ ദൃശ്യങ്ങൾ അന്ന് ഏറെ ശ്രദ്ധനേടിയിരുന്നു. കൊവാക്സിൻ മൂന്നാംഘട്ട പരീക്ഷണത്തിലായിരുന്നു മന്ത്രി പങ്കെടുത്തത്.

Also Read : ചൈനയ്‌ക്ക് തിരിച്ചടി, പാകിസ്ഥാന് ഞെട്ടൽ; യുഎസിൽ നിന്ന് 90 ലക്ഷം ഡോളറിന്റെ ആയുധങ്ങൾ ഇന്ത്യയിലേക്ക്


വിഷയത്തിൽ പ്രതികരിച്ച ഭാരത് ബയോടെക്ക് കൊവാക്സിൻ ക്ലിനിക്കൽ പരീക്ഷണങ്ങൾ 28 ദിവസത്തെ ഇടവേളകളിലായി രണ്ട് ഡോസ് ഷെഡ്യൂളിനെ അടിസ്ഥാനമാക്കിയുള്ളതാണെന്നാണ് പറഞ്ഞത്. രണ്ടാം ഡോസ് നൽകി 14 ദിവസത്തിന് ശേഷമാണ് വാക്സിൻ ഫലപ്രപ്തി നിർണ്ണയിക്കുക. രണ്ട് ഡോസുകളും ലഭിക്കുമ്പോൾ ഫലപ്രദമാകുന്ന രീതിയിലാണ് കൊവാക്സിൻ രൂപകൽപ്പന ചെയ്തതെന്നും ഭാരത് ബയോടെക് പറഞ്ഞു.

ഹരിയാനയിൽ ഇതുവരെ 2.4 ലക്ഷം പേർക്കാണ് കൊവിഡ് സ്ഥിരീകരിച്ചത്. 2539 മരണങ്ങളും റിപ്പോർട്ട് ചെയ്തു. അതേസമയം രാജ്യത്ത് കഴിഞ്ഞ 24 മണിക്കൂറിനിടെ 36,652 കൊവിഡ് കേസുകളാണ് സ്ഥിരീകരിച്ചത്. ഇതോടെ ആകെ കൊവിഡ് ബാധിതരുടെ എണ്ണം 96,08,211 ആയി ഉയർന്നിരിക്കുകയാണ്. 4,09,689 സജീവ രോഗികളാണ് നിലവിൽ രാജ്യത്തുള്ളത്. 90,58,822 പേർക്ക് രോഗമുക്തി ലഭിച്ചതായും ആരോഗ്യ മന്ത്രാലയം വ്യക്തമാക്കി. കഴിഞ്ഞദിവസം 42,533 പേരാണ് രോഗം ഭേദമായി ആശുപത്രി വിട്ടത്.