ഗംഭീറിനു പിന്നാലെ കെജ്രിവാളെയും കാണ്മാനില്ലെന്ന് പോസ്റ്ററുകള്‍; ഡല്‍ഹിയില്‍ പ്രതിഷേധം

ന്യൂഡല്‍ഹി: ഡല്‍ഹി മുഖ്യമന്ത്രിയും ആം ആദ്മി പാര്‍ട്ടി നേതാവുമായ അരവിന്ദ് കെജ്രിവാളിനെ കാണ്മാനില്ലെന്ന് പോസ്റ്ററുകള്‍. മുന്‍ക്രിക്കറ്റ് താരവും ഈസ്റ്റ് ഡല്‍ഹിയില്‍ നിന്നുള്ള ബിജെപി എംപിയുമായ ഗൗതം ഗംഭീറിനെ കാണ്മാനില്ലെന്ന പോസ്റ്ററുകള്‍ക്ക് പിന്നാലെയാണിത്.

Also Read: എന്‍റെ ജിലേബിയാണ് മലിനീകരണത്തിന് കാരണമെങ്കില്‍ ഇനി ജിലേബിയേ കഴിക്കുന്നില്ലെന്ന് ഗൗതം ഗംഭീര്‍

ബിജെപി യുവ മോര്‍ച്ചാ നേതാവ് സജീഷ് ഉപാദ്യായ് ആണ് പ്രതിഷേധ പോസ്റ്ററുകളുമായി രംഗത്തെത്തിയിരിക്കുന്നത്. 'ഡല്‍ഹിയിലെ ജല ബോര്‍ഡ് ചെയര്‍മാനായ അരവിന്ദ് കെജ്രിവാളിനെ ആരെങ്കിലും കണ്ടിട്ടുണ്ടോ?' എന്നാണ് പ്രതിഷേധ പോസ്റ്ററുകളില്‍ പരാമര്‍ശിച്ചിരിക്കുന്നത്. കെജ്രിവാള്‍ തലയ്ക്കു കൈ വച്ചിരിക്കുന്ന ചിത്രമാണ് അദ്ദേഹത്തെ കാണ്മാനില്ലെന്ന പോസ്റ്ററില്‍ ഉപയോഗിച്ചിരിക്കുന്നത്.


ഡല്‍ഹിയിലെ ഐടിഒ ഏരിയയിലാണ് ഗൗതം ഗംഭീറിനെതിരെ പ്രതിഷേധ പോസ്റ്ററുകള്‍ കാണപ്പെട്ടത്. 'ഇദ്ദേഹത്തെ കണ്ടവരുണ്ടോ? അവസാനമായി കണ്ടത് ഇന്‍ഡോറില്‍ ഇരുന്ന് ജിലേബി കഴിക്കുന്നതായിട്ടാണ്. ഡല്‍ഹി മുഴുവനും ഇദ്ദേഹത്തെ തെരയുകയാണ്'. ഗംഭീറിന്റെ ചിരിക്കുന്ന ചിത്രത്തിനോടൊപ്പം ചുവന്ന നിറത്തിലാണ് അദ്ദേഹത്തെ 'കാണ്മാനില്ല' എന്നാണ് പോസ്റ്ററുകളില്‍ എഴുതിയിരിക്കുന്നത്.

Also Read: 'ഗൗതം ഗംഭീറിനെ കാണ്മാനില്ല; കണ്ടവരുണ്ടോ?' ഡല്‍ഹിയില്‍ പ്രതിഷേധ പോസ്റ്ററുകള്‍