Ayodhya Verdict:അയോധ്യ വിധിയെ മാനിച്ചുകൊണ്ട് ഐക്യം കാത്തുസൂക്ഷിക്കണം: രാഹുൽ ഗാന്ധി
അയോധ്യ കേസിൽ സുപ്രീം കോടതി വിധിയെ ബഹുമാനിച്ചുകൊണ്ട് പരസ്പര ഐക്യം നിലനിർത്തണമെന്ന് കോൺഗ്രസ് നേതാവ് രാഹുൽ ഗാന്ധി. വിധിയ്ക്ക് പിന്നാലെ ട്വിറ്ററിലൂടെയാണ് അദ്ദേഹത്തിന്റെ പ്രതികരണം.
Samayam Malayalam 9 Nov 2019, 3:45 pm
ന്യൂഡൽഹി: അയോധ്യ വിധിയിൽ പ്രതികരണവുമായി കോൺഗ്രസ് മുൻ അധ്യക്ഷൻ രാഹുൽ ഗാന്ധി. അയോധ്യ വിഷയത്തിൽ സുപ്രീം കോടതി വിധി പുറപ്പെടുവിച്ചിരിക്കുകയാണെന്നും വിധിയെ ബഹുമാനിച്ചുകൊണ്ട് എല്ലാവരും പരസ്പര ഐക്യം നിലനിർത്തണമെന്നും അദ്ദേഹം ട്വീറ്റ് ചെയ്തു.
'ഇത് എല്ലാ ഇന്ത്യക്കാരുടെയും സാഹോദര്യത്തിന്റെയും വിശ്വാസത്തിന്റെയും സ്നേഹത്തിന്റെയും സമയമാണ്.'രാഹുൽ ട്വിറ്ററിലൂടെ പറഞ്ഞു. കോടതി വിധിയ്ക്ക് പിന്നാലെ ഹിന്ദിയിലാണ് രാഹുൽ ഗാന്ധി ട്വീറ്റ് ചെയ്തത്.
നേരത്തെ സുപ്രീം കോടതി വിധിയ്ക്ക് പിന്നാലെ ട്വിറ്ററിലൂടെ തന്നെ പ്രധാനമന്ത്രി നരേന്ദ്ര മോദിയും പ്രതികരിച്ചിരുന്നു. 130 കോടി ജനങ്ങളും സുപ്രീം കോടതി വിധിയെ സമാധാനത്തോടെയാണ് സ്വീകരിച്ചതെന്നും ഇത് രാജ്യത്തിന്റെ സഹവർത്തിത്വത്തെയും പ്രതിബദ്ധതയെയും വെളിവാക്കുന്നതാണെന്നുമായിരുന്നു മോദിയുടെ പ്രതികരണം.
Also Read: ayodhya Verdict Result: തർക്കഭൂമിയിൽ ക്ഷേത്രം; ട്രസ്റ്റ് രൂപീകരിക്കും; പള്ളി പണിയാൻ സ്ഥലം കണ്ടെത്തും
11 മണിയോടെയായിരുന്നു അയോധ്യ ഭൂമിതര്ക്ക കേസില് സുപ്രീംകോടതി വിധി പ്രസ്താവം നടത്തിയത്. തര്ക്കം നിലനില്ക്കുന്ന 2.77 ഏക്കര് സ്ഥലം മൂന്നായി വിഭജിക്കാനുള്ള അലഹബാദ് ഹൈക്കോടതിയുടെ വിധി തെറ്റെന്ന് ചൂണ്ടിക്കാട്ടിയ സുപ്രീംകോടതി തർക്ക ഭൂമി ക്ഷേത്രത്തിന് നൽകാമെന്ന് വ്യക്തമാക്കുകയായിരുന്നു.
മുസ്ലീംങ്ങള്ക്ക് അഞ്ച് ഏക്കര് ഭൂമി നല്കുമെന്നും കോടതി വ്യക്തമാക്കി. അവിടെ പള്ളി പണിയാം. മൂന്ന് മാസത്തിനുള്ളില് ട്രസ്റ്റ് രൂപീകരിച്ച് തീരുമാനം എടുക്കണമെന്നും ചീഫ് ജസ്റ്റിസ് അധ്യക്ഷനായ ഭരണഘടനാ ബെഞ്ച് വ്യക്തമാക്കിയിട്ടുണ്ട്.