ലോക്ക്ഡൗൺ നിയന്ത്രണങ്ങൾ ലംഘിച്ച് ക്ഷേത്രത്തിൽ ഉത്സവം; നൂറുകണക്കിന് ആളുകൾ പങ്കെടുത്തു

ബെംഗളൂരു: കർണാടകയിലെ കൽബുർഗിയിൽ ലോക്ക്ഡൗൺ നിയമങ്ങൾ ലംഘിച്ച് ആളുകൾ ക്ഷേത്രോത്സവത്തിൽ പങ്കെടുത്തു. ചിറ്റാപൂർ ഗ്രാമത്തിലെ സിദ്ധലിംഗേശ്വര ക്ഷേത്രത്തിൽ നടന്ന രഥോത്സവത്തിൽ നൂറുകണക്കിന് ആളുകളാണ് നിയന്ത്രണങ്ങൾ ലംഘിച്ച് പങ്കെടുത്തത്. സംഭവത്തിൽ 20 പേർക്കെതിരെ പോലീസ് കേസെടുത്തു.

വ്യാഴാഴ്ച രാവിലെ ആറരയോടെ നടന്ന ഉത്സവത്തിൽ ഏകദേശം 100നു 150നും ഇടയിൽ ആളുകൾ പങ്കെടുത്തതായി കൽബുർഗി എസ്‍പി ലാഡ മാർട്ടിൻ പറഞ്ഞു. 20 മിനിറ്റോളം രഥം വലിക്കൽ ചടങ്ങുണ്ടായിരുന്നു. ഇതിൽ പങ്കെടുക്കാനാണ് ആളുകൾ എത്തിയതെന്നും അദ്ദേഹം കൂട്ടിച്ചേർത്തു. സംഭവവുമായി ബന്ധപ്പെട്ട് സബ് ഇൻസ്പെക്ടറെ സസ്പെൻഡ് ചെയ്തു.

ഉത്സവത്തിൽ പങ്കെടുത്തവർക്കെതിരെ കർശന നടപടി സ്വീകരിക്കുമെന്നും സംഭവത്തിൽ അന്വേഷണം നടക്കുകയാണെന്നും എസ്‍പി വ്യക്തമാക്കി.ക്ഷേത്ര മാനേജ്മെന്റിനെതിരെ കേസ് എടുത്തിട്ടുണ്ട്. ക്ഷേത്രകമ്മിറ്റിയാണോ ഘോഷയാത്ര സംഘടിപ്പിച്ചതെന്ന് പോലീസ് അന്വേഷിച്ച് വരികയാണ്. ഉത്സവം നടത്തരുതെന്ന് ക്ഷേത്ര സമിതിയോട് നേരത്തെ യോഗത്തിൽ ആവശ്യപ്പെട്ടിരുന്നുവെന്നും പോലീസ് പറഞ്ഞു.

Also Read: ബിഹാറില്‍ 24 മണിക്കൂറിനിടെ നാലിടത്ത് ആരോഗ്യപ്രവർത്തകർക്കെതിരെ ആക്രമണം

കർണാടകയിലെ കൊറോണ വൈറസ് ഹോട്ട്‌സ്പോട്ട് പ്രദേശങ്ങളിലൊന്നാണ് കൽബുർഗി. ജില്ലയിൽ കൊവിഡ് ബാധിച്ച് ഇതുവരെ മൂന്ന് പേരാണ് മരിച്ചത്. രാജ്യത്ത് ആദ്യമായി കൊവിഡ് മരണം റിപ്പോർട്ട് ചെയ്തതും ഇവിടെയാണ്.