ഭീകരവാദത്തെ പിന്തുണച്ചിട്ടില്ലെന്ന് സക്കീർ നായിക്

മുംബൈ: ഒരിക്കലും ഭീകരവാദത്തെ പിന്തുണച്ചിട്ടില്ലെന്ന് ഇസ്ലാമിക പ്രഭാഷകൻ സക്കീർ നായിക്. ഏതെങ്കിലും തരത്തിൽ തീവ്രവാദത്തിനോ അക്രമങ്ങള്‍ക്കോ താന്‍ പിന്തുണ നല്‍കിയിട്ടില്ലെന്ന് പ്രസ്താവനയിലൂടെ അദ്ദേഹം വ്യക്തമാക്കി. ഒരു തരത്തിലുള്ള തീവ്രവാദസംഘടനകള്‍ക്കും താന്‍ പിന്തുണ പ്രഖ്യാപിച്ചിട്ടില്ലെന്നും നായിക് പറഞ്ഞു. ഇന്ന് മുംബൈയില്‍ തിരിച്ചെത്തി വാര്‍ത്താ സമ്മേളനം നടത്തുമെന്ന് സാക്കിര്‍ നേരത്തെ അറിയിച്ചിരുന്നു. എന്നാല്‍, സൗദി അറേബ്യയില്‍ കഴിയുന്ന സാക്കിര്‍ വാര്‍ത്താക്കുറിപ്പ് ഇറക്കുകയാണ് ചെയ്തത്.

ധാക്കയില്‍ 20 പേരുടെ മരണത്തിന് കാരണമായ ഭീകരാക്രമണത്തില്‍ ഉള്‍പ്പെട്ട ഭീകരര്‍ക്ക് സക്കിര്‍ നായിക്കിന്റെ പ്രഭാഷണം പ്രചോദനമായിട്ടുണ്ടെന്ന ആരോപണങ്ങള്‍ക്കിടെയാണ് നായിക്കിന്റെ പ്രതികരണം. "ഇതുവരെ ഇന്ത്യന്‍ സര്‍ക്കാര്‍ തന്നോട് ഒരു വിശദീകരണവും ആവശ്യപ്പെട്ടിട്ടില്ല. എന്നില്‍നിന്നും ഇന്ത്യന്‍ അന്വേഷണ സംഘത്തിന് ഗുണകരമാകുന്ന എന്തെങ്കിലും വിവരം നല്‍കാന്‍ സാധിച്ചാല്‍ അത് സന്തോഷത്തോടെ ചെയ്യും. സര്‍ക്കാര്‍ അന്വേഷണവുമായി പൂര്‍ണമായി സഹകരിക്കും". ധാക്കയിലുണ്ടായ ഭീകരാക്രമണത്തില്‍ മാധ്യമങ്ങള്‍ നടത്തുന്ന വിചാരണ തന്നെ ഞെട്ടിച്ചുവെന്നും സാക്കിര്‍ പ്രതികരിച്ചു.

സൗദി അറേബ്യയില്‍ നിന്നും മുംബൈയിലേക്ക് മടങ്ങിവരാനിരുന്ന നായികിന്റെ യാത്ര റദ്ദാക്കിയിട്ടുണ്ട്. സമയം അനുവദിക്കുകയാണെങ്കില്‍ അടുത്ത ഏതാനും ദിവസത്തിനകം തനിക്കെതിരെ ഉയര്‍ന്ന ആരോപണങ്ങളുടെ വിഡിയോകള്‍ക്കുള്ള മറുപടി നല്‍കും. ടെലിവിഷനില്‍ തന്റേതെന്ന് പറഞ്ഞു പ്രചരിക്കുന്ന വിഡിയോകളും പ്രതികണങ്ങളും സന്ദര്‍ഭത്തില്‍ നിന്നും അടര്‍ത്തി ഉപയോഗിക്കുന്നതാണെന്നും സക്കീര്‍ നായിക് പറ‍ഞ്ഞു.

നായിക് തിരിച്ചു വന്നയുടനെ ഇയാളെ അറസ്റ്റ് ചെയ്യണമെന്ന് ശിവസേന ആവശ്യപ്പെട്ടിരുന്നു. മഹാരാഷ്ട്ര പൊലീസും ദേശീയ അന്വേഷണ ഏജന്‍സിയും നായിക്കിന് സമന്‍സ് അയച്ചിട്ടുണ്ട്.