മദ്രാസ് ഐഐടിയില്‍ സ്ത്രീകളുടെ ശുചിമുറിയില്‍ കയറി ദൃശ്യം പകര്‍ത്തി ജീവനക്കാരന്‍; കയ്യോടെപൊക്കി വിദ്യാര്‍ത്ഥിനി

ചെന്നൈ։ സ്ത്രീകളുടെ ശുചിമുറി ദൃശ്യങ്ങള്‍ ചിത്രീകരിച്ചതിന് മദ്രാസ് ഐഐടി പ്രോജക്ട് ഓഫീസറെ അറസ്റ്റ് ചെയ്തു. ചുമരില്‍ ഉണ്ടാക്കിയ ദ്വാരത്തിലൂടെ ദൃശ്യങ്ങള്‍ പകര്‍ത്താന്‍ ശ്രമിച്ച ഇയാളെ വിദ്യാര്‍ത്ഥിനി തന്നെ കയ്യോടെ പിടികൂടുകയായിരുന്നു.

Also Read : ട്രംപിൻ്റെ സന്ദർശനം; ഇന്ത്യ ആണവ റിയാക്‌ടറുകൾ വാങ്ങിയേക്കും - കരാർ പരിഗണനയിൽ

ഏറോസ്പെയ്സ് എന്‍ജിനിയറിങ്ങ് ഡിപ്പാര്‍ട്ട്മെന്റ് പ്രൊജക്ട് ഓഫീസറായ ശുഭം ബാനര്‍ജിയാണ് ഇത്തരത്തില്‍ അറസ്റ്റിലായത്. കഴിഞ്ഞ വര്‍ഷമാണ് ഇയാള്‍ ഇവിടെ ജോലിയില്‍ പ്രവേശിച്ചത്. പരാതിക്കാരിയായ പെണ്‍കുട്ടിയും ഐഐടിയിലെ ഒരു ഗവേഷക വിദ്യാര്‍ത്ഥിയാണ്.

തിങ്കളാഴ്ച രാത്രിയാണ് സംഭവം, ക്ലാസ് മുറിയില്‍ നിന്നും പുറത്തിറങ്ങി ശുചിമുറിയില്‍ പോയ വിദ്യാര്‍ത്ഥിനി ചുമരിലെ ദ്വാരത്തിലൂടെ അസ്വാഭാവികമായ അനക്കം കണ്ടപ്പോള്‍ ആരോ ഒരോള്‍ അടുത്തുള്ള ശുചിമുറിയില്‍ ഇരുന്ന് ക്യാമറയില്‍ ചിത്രീകരിക്കുന്നതായി മനസ്സിലാക്കി. ഉടന്‍ തന്നെ പുറത്തിറങ്ങി ഇയാള്‍ ഇരുന്നിരുന്ന മുറി പുറത്തുനിന്നും പൂട്ടുകയായിരുന്നു. തുടര്‍ന്ന് മറ്റ് അധ്യാപകരേയും സുഹൃത്തുക്കളേയും സെക്യൂരിറ്റി ഉദ്യോഗസ്ഥരേയും വിവരം അറിയിക്കുകയും ചെയ്യുകയായിരുന്നു.

Also Read : ടി പി സെൻകുമാറിന് എൻഡിഎയുമായി ബന്ധമില്ല: വി മുരളീധരൻ

അധികൃതര്‍ വിവരം അറിയിച്ചതിനെത്തുടര്‍ന്ന് കോട്ടൂര്‍പുരം പോലീസ് സ്ഥലത്ത് എത്തി ഇയാളെ അറസ്റ്റ് ചെയ്തു. തുടര്‍ന്ന് പോലീസ് നടത്തിയ പരിശോധനയില്‍ ഇയാളുടെ ഫോണില്‍ നിന്നും ഒന്നും കണ്ടെത്താന്‍ സാധിച്ചില്ല. ഇയാള്‍ അത് ഡിലീറ്റ് ചെയ്തു കാണും എന്നാണ് പോലീസ് കരുതുന്നത്. വിദഗ്ദ്ധ പരിശോധനയ്ക്കായി മൊബൈല്‍ ഫോണ്‍ ഫോറന്‍സിക് ലാബിലേക്ക് അയച്ചിരിക്കുകയാണ്. പ്രതിയെ കോടതിയില്‍ ഹാജരാക്കിയെങ്കിലും ജാമ്യം അനുവദിച്ചിരിക്കുകയാണ്. ഇയാള്‍ മറ്റെന്തെങ്കിലും കുറ്റം ചെയ്തിട്ടുണ്ടോ എന്ന് അന്വേഷിച്ച് വരികയാണെന്ന് പോലീസ് അറിയിച്ചു.