'പ്രോടെം സ്പീക്കറുടെ നേതൃത്വത്തിൽ വിശ്വാസവോട്ടെടുപ്പ് നടക്കണം'; ഉപാധികള്‍ മുന്നോട്ടുവെച്ച് ത്രികക്ഷി സഖ്യം

മഹാരാഷ്ട്ര സര്‍ക്കാര്‍ രൂപീകരണക്കേസിൽ ശിവസേനയ്ക്ക് വേണ്ടി മുതിര്‍ന്ന അഭിഭാഷകനും കോൺഗ്രസ് നേതാവുമായ കപിൽ സിബലാണ് സുപ്രീംകോടതിയിൽ ഹാജരായത്. അതേസമയം എൻസിപിക്കായി മുതിര്‍ന്ന കോൺഗ്രസ് നേതാവ് അഭിഷേക് മനു സിങ്വിയാണ് വാദിച്ചത്.

മഹാരാഷ്ട്ര സര്‍ക്കാര്‍ രൂപീകരണത്തിൽ ത്രികക്ഷി സഖ്യത്തിന് പിന്തുണ അറിയിച്ച് 154 എംഎൽഎമാർ ഒപ്പിട്ട സത്യവാങ്മൂലം ശിവസേനയ്ക്ക് വേണ്ടി ഹാജരായ കപിൽ സിബൽ കോടതിയിൽ സമര്‍പ്പിച്ചു. മഹാരാഷ്ട്രയിലെ 288 അംഗ നിയമസഭയിൽ 145 എംഎൽഎമാരുടെ പിന്തുണയാണ് സര്‍ക്കാര്‍ രൂപീകരിക്കാൻ ആവശ്യം.

മഹാരാഷ്ട്രയിൽ 24 മണിക്കൂറിനുള്ളിൽ വിശ്വാസവോട്ടെടുപ്പ് നടത്തണമെന്ന് പറഞ്ഞ കപിൽ സിബൽ, പ്രോടെം സ്പീക്കറായിഏറ്റവും മുതിർന്ന എംഎൽഎയെ കോടതി നിയമിക്കണമെന്നും ആവശ്യപ്പെട്ടു.

ജനാധിപത്യത്തിന് കളങ്കമുണ്ടാക്കുന്ന പ്രവർത്തിയാണ് അജിത് പവാർ ചെയ്തതെന്ന് എൻസിപിക്ക് വേണ്ടി ഹാജരായ അഭിഷേക് മനു സിങ്വി കോടതിയിൽ വാദിച്ചു. എൻസിപി എംഎൽഎമാരുടെ ഒപ്പ് അജിത് പവാർ ദുരുപയോഗം ചെയ്തുവെന്നും അദ്ദേഹം ആരോപിച്ചു. ഞാനാണ് എൻസിപി എന്ന് പറയുന്ന അജിത് പവാറിൻ്റെ വാദം കോടതി ഞെട്ടലോടെ കേൾക്കണമെന്നും സിങ്വി.

മഹാരാഷ്ട്രയിൽ ഇന്നോ നാളെയോ വിശ്വാസവോട്ടെടുപ്പ് നടത്തണമെന്ന് എൻസിപിക്ക് വേണ്ടി ഹാജരായ അഭിഷേക് മനു സിങ്വി ആവശ്യപ്പെട്ടു. വിശ്വാസവോട്ടെടുപ്പ് തത്സമയം സംപ്രേക്ഷണം ചെയ്യണമെന്നും അഭിഷേക് മനു സിങ്വി.